Prezidente Repúblika, Francisco Guterres Lú Olo, Prezide Reuniaun KSDS iha Palásiu Prezidente Nicolau Lobato, Bairru Pite, Dili, Kuarta, (08/05). Imajen Tatoli/Egas Cristovão

DILI, 05 agostu 2020 (TATOLI)-Hafoin rona opiniaun hosi Konsellu Superiór Defeza Seguransa (KSDS) no Konsellu Estadu, iha posibilidade ohin Prezidente Reúblika (PR) Francisco Guterres ‘Lú Olo’ sei haruka proposta hosi Governu kona-ba propoin Estadu Emerjénsia (EE) ba fulan ida tan relasiona ho surtu COVID-19.

Asesór Polítika Prezidente Repúblika, Gregório de Sousa, hato’o asuntu ne’e hafoin reuniaun KSDS no Konsellu Estadu iha iha salaun Xina, iha Palásiu Prezidensiál, Bairro Pité.

“Reuniaun ohin iha diskusaun hafoin sira fó opiniaun no konsellu ba Prezidente Repúblika, agora prepara hela atu aprova no enkamiña pedidu Governu nian ba Parlamentu Nasionál tanba Parlamentu mak sei diskute no deside atu autoriza ka la autoriza tuir kompeténsia Parlamentu Nasionál nian. Ohin, iha posibilidade enkamiña ba Parlamentu atu diskute tuir ajenda,” tenik Gregório de Sousa, kuarta ne’e.

Notísia Relevante: Xefe Estadu konvoka reuniaun ho KSDS-Konsellu Estadu relasiona ho EE

Iha enkontru ne’e, nia haktuir membru KSDS no Konsellu Estadu manifesta apoia ba pedidu Governu atu dekreta EE ba dahaat.

“Ita-nia membru sira manifesta apoia no sira dehan katak ai-moruk COVID-19 nia di’ak liu mak halo prevensaun no presiza halo tan lei balun atu iha prevensaun ne’e no labele Estadu Emerjénsia hela de’it,” nia akresenta.

Entretantu, KSDS ne’ebé partisipa iha reuniaun ne’e maka Prezidente Repúblika Francisco Guterres ‘Lú Olo’, Primeiru-Ministru Taur Matan Ruak, Ministra Negósiu Estranjeiru no Kooperasaun Adalzija Magno, Ministru Defeza no Seguransa Filomeno da Paixão de Jesus, Ministru Justisa, Manuel Cárceres. 

Hosi Parlamentu Nasionál, David Dias Ximenes, Abel Pires da Silva, Xefe Estadu Maiór Jenerál FALINTIL-Forsa Defeza Timor Leste (F-FDTL), Majór Jenerál Lere Anan Timur, Komandante Jerál Polisia Nasionál Timor Leste (PNTL), Komisáriu Faustino da Costa, José Manuel Fernandes ‘nakfilak’, konvida mós eis Primeiru- Ministru Rui Maria de Araújo, no infectologista Daninha Coelho ho Diretór Ezekutivu Forum Organizasaun Naun Governamentál (FONGTIL) Daniel Santos do Carmo.

Membru Konsellu Estadu ne’ebé partisipa iha reuniaun ne’e mak hanesan Prezidente Repúblika Francisco Guterres ‘Lú Olo’, Primeiru-Ministru Taur Matan Ruak, Prezidente Parlamentu Nasionál Aniceto Guterres Lopes.

Membru ne’ebé nomeia hosi Prezidente Repúblika mak hanesan Oscár Lima, Alcino de Araújo Barris, Maria Dadi Soares Magno, Laura Soares Abrantes, Faustino da Costa, no nomeia hosi Parlamentu Nasionál mak hanesan Eduardo de Deus ‘Dusae’, Aurora Ximenes, José Cornelio Guterres, Arcánjelo de Jesus Gouveia Laite, no José dos Santos ‘Naimori Bukar’.

Membru Konsellu Estadu eis Prezidente Repúblika José Manuel Ramos Horta no eis Prezidente Repúblika Kay Rala Xanana Gusmão la marka prezensa iha enkontru ne’e.

Jornalista: Florêncio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here