Trabailador no estudante sira neebe servisu no estuda iha Korea do Sul wainhira too iha Aeroportu Internasional Nicolao Lobato Dili, 5 Agostu 2020.Imajen/Antonio Goncalves

DILI, 05 agostu 2020 (TATOLI)-Ministériu Saúde daudaun ne’e kontinua kontrata otél hamutuk 10 hodi sai fatin kuarentena obrigatóriu ba sidadaun Timoroan atus rua-resin ne’ebé maka kuarta ne’e fila mai Timor-Leste hodi prevene transmisaun pandemia globál surtu coronavirus.

Koordenadora Jerál Komisaun Ezekutivu Saúde ba Surtu COVID-19, Odete da Silva Viegas, relata ohin, abitante hirak ne’e mai ho aviaun Citilink hamutuk ema na’in 124, Airnorth hamutuk  sanulu no aviaun WFP hamutuk ema na’in 60-resin.

”Pasajeiru sira husi Citilink ne’e mai husi Korea Súl hamutuk 124 aviaun Airnoth husi Austrália hamutuk 11 no aviaun WFP tula pasajeiru umanitáriu hamutuk 60-resin no pasajeiru sira ne’e sei hela iha otél 10 ne’ebé mak Ministériu Saúde kontratu antes ona hahú husi Estadu Emerjénsia dahuluk nian,” dehan nia iha ninia servisu fatin Caicoli Dili.

Otél sanulu ne’e maka  Otél Fantiza, Novo Horizonte, Luz Clarita, Sakura Tower, Garden Beach, Yuqe Otél no seluk tan.

“Otél sira ne’ebé mak sidadaun sira hela ba mak antes ne’e Ministériu saúde uza hela entaun otél sira ne’e daudaun pagamentu hotu ona ita uza fila-fali ba sidadaun sira ne’ebé mak agora daudaun mai,”tenik tan.

Entretantu, kuarentena obrigatóriu ne’ebé Governu prepara iha Tasi-Tolu iha kama hamutuk 230, no tuir relatoriu to’o loron 28 fulan-jullu ne’e foin akumula okupante 60.

Kuarentena obrigatóriu Tibar Postu Administrativu Bazartete Munisípiu Liquiça iha kama 31, no to’o semana kotuk iha ona abitante hamutuk 29.

Governu aluga otél hirak ne’e kada kuartu ho folin husi $ 40 to’o $ 50 ba kalan ida durante loron 14.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here