DILI, 05 agostu 2020 (TATOLI)-Governu liuhosi reuniaun Konsellu Ministru sei halo deliberasaun ida hodi troka atuál Prezidente Autoridade Expo Dubai, Francisco Kalbuadi Lay, nune’e bele halo preparasaun di’ak liután hodi Timor-Leste partisipa iha espozisaun internasionál ne’ebé sei realiza iha tinan 2021.
Ministru Turizmu, Komérsiu no Indústria, José Lucas do Carmo da Silva, hateten Governu husu ona ba Francisco Kalbuadi atu hatama karta rezignasaun maibé to’o agora seidauk hatama, tanba ne’e Primeiru-Ministru, Taur Matan Ruak deside troka ema seluk.
“Primeiru-Ministru bolu ha’u mai ko’alia asuntu balun, hanesan asuntu pendente ida ne’ebé mak durante ne’e iha hela Ministériu Turizmu, Komérsiu no Indústria (MTKI) nia liman maka expo Dubai. Despaisu uluk nian iha ona ekipa inklui orsamentu maibé tanba razaun balun entaun asuntu ida ne’e paradu, tanba ne’e maka Primeiru-Ministru bolu ha’u mai buka dalan atu rezolve ida ne’e,” relata Ministru José Lucas hafoin reuniaun ho Xefe Governu, iha Palásiu Governu, kuarta ne’e.
Maibé desizaun ne’e sei aprezenta liuhosi proposta rezolusaun ida ne’ebé sei aprova iha reuniaun Konsellu Ministru iha tempu badak.
Ema ne’ebé sei sai Prezidente Autoridade Expo Dubai maka Ministru Turizmu, Komérsiu no Indústria, José Lucas do Carmo da Silva.
Antes ne’e, Governu liuhusi Konsellu Ministru nomea Francisco Kalbuadi Lay nu’udar Prezidente Autoridade ba Expo Dubai.
Jornalista: Antónia Gusmão
Editora: Julia Chatarina
