Ministru Ensinu Superiór, Siénsia no Kultura, Longuinhos dos Santos. Imajen/Egas Cristovão

DILI, 05 agostu 2020 (TATOLI)-Governu liuhosi Ministru Ensinu Superiór Siénsia no Kultura (MESSK), Longuinhos dos Santos, propoin ona ba Universidade Nasionál Timor Lorosa’e  (UNTL) atu kontinua aplika propinas ba estudante sira hodi selu durante implementasaun Estadu Emerjénsia relasiona ho problema pandemia globál surtu COVID-19.

Governante dehan UNTL nu’udar Instituisaun Públiku ne’ebé iha autonomia finanseira no administrativa, tanba ne’e estudante sira tenki selu propinas hodi apoiu dezenvolvimentu institusionál nian.

Notísia Relevante :Universitáriu Ejize Subsídiu ba Governu

Iha modalidade rua maka MESSK sujere ba Retoriál UNTL atu implementa, dahuluk estudante sira tenki selu kada fulan, no modalidade ida seluk maka selu bainhira estudante sira hetan ona graduasaun.

“Ha’u fó ona modalidade rua ba UNTL atu jere mak modalidade ida dahuluk, kada fulan estudante sira selu de’it $ 5 to’o dezembru, modalidade ida seluk mak estudante sira sei la selu propinas to’o sira ramata estudu bainhira atu foti diploma mak foin selu,” dehan Governante ne’e, ba Tatoli hafoin partisipa retiru ba Membru Governu sira iha edifísiu Ministériu Finansa Aitarak-Laran Dili.

Notísia Relevante :MESSK Hahú Estuda Karta AUTL

Durante ne’e, UNTL aplika propinas ba estudante sira kada semeter $ 30, maibe nia dehan ho situasaun surtu coronavirus ne’e, estudante sira bele selu fazeadamente.

“Modalidade saida mak atu uza ne’e la’ós ita-nia kompotensia maibé kompotensia Instituiusan UNTL liuhusi responsabilidade Magnífiku Reitór nian mak sei deside atu jere oinsá,”tenik Longuinhos.

Notísia Relevante :MESSK ho AUTL seidauk hetan solusaun

Entretantu, Antes ne’e iha loron 17 fulan-jullu 2020, Aliansa Universitáriu Timor-Leste (AUTL) halo konferénsia imprensa ida iha Dili hodi ejize ba Governu liuhosi MESSK atu fó mós subsidíu ba estudante iha rai-laran liuhosi aplikasaun propinas gratuita.

Notísia Relevante :UNTL Anula Propinas ba Estudante

Portavóz AUTL, Moises Magno, dehan Governu halo diskriminasaun ba estudante Timoroan iha Estranjeiro no rai-laran tanba enfreta situasaun hanesan surtu COVID-19.

Iha loron 29 fulan-jullu, reprezentante AUTL halo ona dialogu ho Diretóra Jerál MESSK, Maria Filomena Lay, iha edifísiu MESSK Colmera Dili. Maibé dialogu ne’e la hetan solusaun tanba desizaun polítika tenki foti husi Ministru.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here