Vise Ministru Justisa, José Edmundo Caetano. Imajen/Mídia CAC.

DILI, 05 agostu 2020 (TATOLI)-Ministériu Justisa planea ona atu implementa rejime aberta (nakloke) ba dadur sira ne’ebé kompleta ona kastigu kadeia ‘um terço’ 1/3 atu partisipa prosesu aprendijazen iha eskola sira iha liur ka (la’ós iha kadeia laran).

Vise MInistru Justisa, José Edmundo Caetano, hato’o planu Governu ne’e bainhira halo vizita kortejia ida bá iha Vise Ministru Edukasaun Juventude no Desportu (MEJD), António Guterres, kuarta ne’e iha Vila Verde.

Rejime nakloke ne’e liliu atu fó ba dadur foinsa’e sira ne’ebé sei iha oportunidade atu eskola nune’e bele prepara sira-nia futuru bainhira livre husi kadeia.

Tuir nia implementasaun rejime aberta ne’e servisu integradu ho liña ministeriál  sira inklui MEJD.

Iha biban hanesan Vise MEJD, António Guterres, informa MEJD seidauk iha planu serteza kona-ba kestaun ne’e maibé nia parte prontu atu kolabora ho Ministériu Justisa bainhira atu implementa rejime aberta ba dadur sira.

“Ha’u kontente tebes tanba planu Ministériu Justisa nian ne’e bele aberta ona mai ami atu haree hamutuk asuntu ida ne’e”, dehan Nia.

Maibé nia dehan antes atu implementa polítika ne’e parte relevante hotu presiza kria uluk kondisaun ho didi’ak.

Entretantu, Diretór Estabelesimentu Prijaun Becora Dili, João Domingos, informa  dadus atuál dadur iha komarka Bekora ba loron 05 fulan agostu ne’e hamutuk 587, prijaun kondenadu 461 no prijaun preventiva.

Dadur ho tinan 16 to’o 21 hamutuk ema 37, kondenadu 22, preventiva 12 no medida seguransa na’in ida. Dadur ema estranjeiru hamutuk 15, Indonézia na’in ualu, Filipina na’in lima, Xineza Na’in ida no Austrália na’in ida.

Dadur ne’ebé komete iha kazu droga hamutuk na’in lima kompostu husi Timoroan na’in rua, Indonézia na’in rua no Filipina na’in ida.

Jornalista : Tomé Amado

Editór       : Agapito dos Santos

1 KOMENTÁRIU

  1. Hanesan deit, dadur sira mak diak hela deit.
    hatene katak dadur signifika ema nee iha sala ona,
    maibe ba Kadeia mos fasilita diak liu tan antaun orsida populasaun hakarak halo krime para ba kadeia deit hodi hetan fasilidade diak. haaaaaaaaaaaaaaaa.
    tuir lolos ne’e dadur sira iha prijaun obriga sira ba halo TOOS KA NATAR ou servisu todan nune’e ema tauk hodi halo sala. NO TAUK BA PRIJAUN. TL nian halo Manha tiha fali.

HAKEREK NO HATÁN

Please enter your comment!
Please enter your name here