Plenária Parlamentu Nasionál. Imajen Tatoli/António Gonçalves

DILI, 05 agostu 2020 (TATOLI)—Prezidente Komisaun F (Saúde, Seguransa Sosiál no Igualdade Jéneru), Deputadu Noé da Silva “Buka Tuir”, hateten aplikasaun deklarasaun Estadu Emerjénsia mak dalan di’ak liu halo prevensaun ba prograsaun COVID-19.

“Solusaun di’ak liu mak ita halo fali estensaun Estadu Emerjénsia hodi prevene moras ne’e labele tama iha Timor. Se no caso moras ne’e tama tiha mak ita halo prevensaun entaun susar,” Deputadu Noé da Silva “Buka Tuir” informa ba jornalista sira, iha resintu Parlamentu Nasionál, kuarta ne’e.

Nia hatutan, deklara Estadu Emerjénsia pertinente tanba sirkulasaun moras ne’e iha ita-nia nasaun viziñu sa’e maka’as estaun presiza haree hodi halo prevensaun ba iha Timor-Leste.

Maske nune’e, nia dehan, Komisaun F iha Parlamentu Nasionál rekomenda ba Governu liuhosi Ministériu Saúde atu fasilita ekipamentu médiku no ekipamentu protesaun pesoál ba profisionál saúde hodi kontinua luta kontra propagasaun surtu COVID-19.

“Bazeia ba informasaun sira-ne’ebé relata hosi autoridade munisípiu no observasaun hosi Komisaun F hato’o ba Ministériu Saúde atu fasilita ekipamentu médiku no ekipamentu protesaun pesoál ba profisionál saúde sira hodi luta kontra COVID-19 tanba nasaun viziñu Indonézia númeru pozitivu sa’e makaas,” nia dehan. 

Komisaun F nota iha nune’e mós munisípiu kontinua hala’o vijilánsia no rega dezinfetante ba transporte privada, taka stiker kona-ba medida prevensaun hosi Organizasaun Mundiál Saúde (OMS) no hapara atividade sosiál sira seluk.

Iha Komisaun F nia fiskalizasaun deskobre ministériu kompetente seidauk aloka orsamentu hosi fundu COVID-19 ba munisípiu sira hodi halo kobertura ba despeza ne’ebé liga ho kombate surtu COVID-19.

Komisaun F rekomenda ba Ministériu Saúde atu halo manutensaun regulár ba ekipamentu médiku no transporte, ambulánsia no karreta multi-funsaun hodi bele fasilita serbisu no implementasaun programa saúde iha munisípiu sira.

Komisaun F rekomenda ba MS ho koordenasaun servisu saúde munisipál hodi identifika forsa traballu profisionál saúde hodi reforsa servisu iha sentru no postu saúde sira.

Iha rekomendasaun Komisaun F nian husu MS no serbisu saúde munisipál atu propoin iha orsamentu kona-ba kontrusaun valeta ka bee-dalan iha armazein aimoruk nune’e proteje armazen hosi inundasaun.

Iha relatóriu fiskalizasaun Komisaun F ne’e mós husu MS atu haree kondisaun rezidénsia ba médiku no pesoál saúde iha nível sentru saúde no psotu saúde iha área remota.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here