Sekretária Meza Parlamentu Nasionál, Deputada Lídia Norberta dos Santos Martins, Lidia Norberta dos Santos Martins.

DILI, 05 agostu 2020 (TATOLI)—Deputada Lídia Norberta Martins eleita ba Sekretária Meza Komisaun Permanente no Vise-Sekretáriu mak Deputadu António Verdiál hodi hala’o kna’ar durante parlamentu nia resesu.

Notísia Relevante: Plenária dahuluk komisaun permanente hahú ohin

Molok tama ba votasaun, Prezidente Parlamentu Nasionál, Deputadu Aniceto Guterres, husu bankada parlamentár sira atu hatama kandidatu maibé só FRETILIN no KHUNTO mak propoin, bankada parlamentár sira seluk “nonook de’it”.

Entretantu, proposta kandidata Deputada Lídia Norberta Martins inisia hosi Deputadu Bankada FRETILIN, Deputadu Joaquim dos Santos no Deputadu António Verdiál propoin hosi Deputadu Luis Roberto.

“Ha’u kandidatu ita-nia Sekretária Lídia Noberta ba Sekretária Meza Komisaun Permanente nune’e servisu bele efetivu liu,”  Deputadu Joaquim dos Santos propoin liuhosi plenária, kuarta ne’e.

Deputadu Bankada KHUNTO, Luis Roberto hateten, nia parte propoin Deputadu António Verdiál.

“Ha’u-nia hanoin mós hanesan Deputadu Joaquim dos Santos nian tanba ne’e ami propoin Deputadu António Verdiál ba Vise-Sekretária Komisaun Permanente nian,” dehan Deputadu Luis Roberto.

Ho proposta rua ne’e, Prezidente Parlamentu Nasionál, Deputadu Aniceto Guterres, aseita proposta ne’e tanba laiha tán proposta seluk hosi bankada parlamentár sira seluk. Prosesu eleisaun ne’e hala’o eskrutíniu sekretu.

Prezidente Parlamentu Nasionál, anunsia rezultadu votasaun a-favór 20 kontra 0 no abstensaun 0. Totál bulletin votu 20. Iha prosesu ne’e deputadu bankada CNRT maioria auzénsia.

“Ho nune’e Sekretária no Vise-Sekretária eleze sira-nia funsaun, parabéns ba Deputada Lídia Norderta no Deputadu António Verdiál,” dehan PPN, Aniceto Guterres.

Hafoin eleita ba Komisaun Permanente, Deputada Lídia Norberta no Deputadu António Verdiál sa’e ba kedas ba meza hodi dirije reuniaun pelnária dahuluk Komisaun Permanente nian.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here