Diretór Asia Justice and Rights (AJAR), José Luis Oliveira. Imajen/Osória Marques.

DILI, 04 agostu 2020 (TATOLI)–Diretór Asia Justice and Rights (AJAR), José Luis Oliveira, hateten Governu la presiza halo estensaun ba Estadu Emerjénsia (EE) ba dahaat maibé Governu presiza hametin reforsa portaun entrada sira hanesan aeroportu, portu no fronteira rai maran sira.

José Oliveira hateten, informasaun kona-ba COVID-19 iha rai-laran defaktu haree katak hafoin ramata EE datoluk ne’e, aeroportu no portu seidauk funsiona normál no fronteira maka loke maibé semana ida loke dala ida, ida-ne’e regra ida-ne’ebé maka Governu foti la bazea ba EE. Maibé, nia dehan, regra medida adminidtrativu ne’ebé maka foti tanba haree ba situasaun pandémia global iha mundu ne’ebé to’o agora seidauk ramata.

“Ami husu Governu lalika estende estadu Emerjénsia. Medida ne’ebé ita atu foti maka hametin de’it regra administrativa maka akontese ne’e ita uza. Tanba durante EE datolu to’o agora, fronteria, portu no  aeroportu kontroladu hotu ne’ebé ita presiza maka hametin de’it regra sira-ne’e no agora ema tama mai ita presiza fó paríodu tama lai kuarentena, atu nune’e aplika medida preventiva,” dehan José Luis Oliveira ba jornalista sira hafoin partisipa diskusaun meza kabuar ho topiku “Estadu Direitu Demokratiku: Analiza Kritiku ba Implementasaun iha Kontekstu Politika, Legal no Sosial Timorense” iha salaun Pos Graduasaun UNPAZ, Osindu, Dili, tersa ne’e.

Nia hatutan, presiza iha kontrolu nafatin ba fronteira tanba iha momentu EE datoluk ne’e haree katak kazu ne’e transmisaun mai hosi rai liur ka importadu to’o iha nivél transmisaun lokál. Tanba ne’e, agora presiza tebes kontinua atu kontrolu maka fronteira, aeroportu no portu sira ne’e maibé la presiza estende tan EE ba dahaat.

Diretór ne’e hatutan, loloos situasaun hanesan ne’e presiza maka aumenta siguransa sira iha fronteira atu hametin no kontrolu siguransa iha postu sira ne’e, tanba durante sira servisu iha imigrasaun fronteira semana ida pontu entrada loke dala ida, ne’e normál no servisu la bazeia ba EE ne’ebé agora ne’e presiza maka hametin de’it.

Jornalista : Osória Marques

Editór      : Cancio Ximenes

 

HAKEREK NO HATÁN

Please enter your comment!
Please enter your name here