Diretór Eskola EBC Bidau Akadiruhun, Mateus Pinto Tilman. Imajen: Tomé Amado

DILI, 04 agostu 2020 (TATOLI)-Família uma-kain ualu to’o oras ne’e sei kontinua okupa areadór Eskola Ensinu Báziku Sentrál Akadiruhun tanba Governu seidauk hasai desizaun hodi muda sai ba okupante sira husi fatin ne’ebá.

Diretór Eskola, Mateus Tilman, hateten Governu liuhosi Ministériu Edukasaun Juventude no Desportu tenki foti ona desizaun para muda sai komunidade hirak ne’e tanba durante ne’e difikulta prosesu aprendizajen estudante sira-nian.

Tuir nia lorloron estudante sira tenki hamoos fo’er ne’ebé maka komunidade so’e arbiru iha área eskola nian no pior liután mak fo’er ema nian.

“Ha’u-nia estudante sira mai eskola atu estuda la’ós atu mai hamoos fali ema seluk nia fo’ér,  hanesan popok ne’ebé nakonu ho labarik nia fo’er ne’ebé animal dada to’o varanda eskola nian,”katak nia ba Tatoli, iha salaun Ensinu Báziku Filiál númeriu 01 Nularan Bairo dos Grilhos.

Nia parte laiha kbi’it atu hasai komunidade hirak ne’e ho obrigatóriumente tanba laiha kompotensia.

“Ami ejize nafatin ba Ministériu Edukasaun liuhusi Diretór Servisu Edukasaun Munisípiu Dili atu toma medida ba kestaun ne’e tanba prezensa família sira ne’e prejudika tebes prosesu ensinu aprendijazen ba labarik sira,”nia hateten.

Hatan ba preokupasaun ne’e, Diretór Servisu Edukasaun Munisípiu Dili, Duarte Bragansa, hateten atu muda sai komunidade hirak ne’e MEJD presiza osan hamutuk $ 4.000 atu fasilita Ministériu hodi transporte okupante hirak ne’e nia sasán ba fatin foun.

“Ita laiha ona problema ho Diresaun Terras no Propriedade, sira hein de’it parte Ministériu Edukasaun kuandu hatan ona sira prontu maibé Ministériu Edukasaun  seidauk iha osan entaun ami ki’ik iha baze atu halo saida,”katak nia.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here