Ministru Defeza, Filomeno Paixão. Imajen/Media PR.

DILI, 04 agostu 2020 (TATOLI)—Governu liuhosi Ministru Defeza Filomeno Paixão, ohin, hasoru malu ho Prezidente Repúblika, Francisco Guterres “Lú Oo”, aprezenta prioridade Ministériu Defeza nian iha tinan 2021 ne’ebé tuir plau sei rekruta membru F-FDTL hamutuk na’in-600 ho ritmu lalais tanba iha tempu uluk ne’e rekruta membru F-FDTL hamutuk na’in-300 de’it.

“Envez, uluk, ita rekruta uitoan-uitoan ho ema na’in-300 de’it entaun agora ne’e, iha tinan 2021, ita tenki rekruta barak liu. Se bele 600 iha prinsípiu fin-du-anu para bele kompleta númeru ne’ebé uluk ita hakarak,” dehan Ministru Defeza, Filomeno Paixão, ba jornalista sira hafoin ko’alia ho Prezidente Francisco Guterres Lú Olo kona-ba estabelesimentu Autoridade Marítima no servisu parseria ho nasaun seluk hanesan Australia, Estadu Unidu no ho Xina, ne’ebé Agência TATOLI asesu liuhosi rede sosiál Presidensia da República Democratica de Timor-Leste, tersa ne’e.

Aleinde ne’e, Filomeno Paixão hatutan, hafoin Timor-Leste hetan nia delimitasaun Fronteira Marítima ho Australia, kestaun seguransa tasi sai preokupasaun Estadu Timor-Leste ninian, tanba ne’e iha tinan-2020 ne’e, Ministru Defeza hatama planu Autoridade Marítima iha Orsamentu Jerál Estadu.

“Autoridade Marítima mai para ita koordena hotu ministériu sira ne’ebé iha servisu ba iha tasi-laran, para depois ita bele poupa meiu, infrastrutura, poupa formasaun, poupa ema no poupa osan,” nia dehan kona-ba estabelesimentu Autoridade Marítima ne’ebé hetan ona aprovasaun husi Konsellu Ministrus no oras ne’e, hein desizaun hosi Prezidente Repúblika.

Kona-ba parseira dezenvolimentu sira, Filomeno Paixão informa, Estadus Unidus prontu para atu dezenvolve aeroportu Baucau ba iha aeroportu polivalente, bele uza ba objetivu hotu-hotu liuliu ba objetivu umanitáriu ba iha populasaun no la’os atu ba funu nian. Nia akresenta, Estadu Unidu mós sei oferese avioneta ida ba Timor-Leste hodi halo vijilánsia marítima iha Kosta Sul no Norte.

Parseria ho Australia, Filomeno Paixão esplika, aleinde Australia sei oferese Ró Ahi Patrulla rua mai Timor-Leste iha final 2023 ka inísiu 2024, Australia mós sei apoiu Timor-Leste hadi’a Portu Naval Hera, no Timor-Leste sei sosa mós Ró Patrulla ida no Ró ba lojistika husi Australia.

Entretantu halo parseria ho Governu Xina, nia dehan, Timor-Leste sei asina nota entendimentu ba kooperasaun kapasitasaun rekursu umanu iha area militár no hetan apoiu ekipamentus no infraestrutura.

“Prezidente konkorda. Dezde ke buat sira ne’ebé ita planu, programa, tuir konseitu estratéjiku militár ne’ebé oras ne’e iha ona Prezidente nia liman, atu lori ba Konsellu Superior Defeza Seguransa atu fó nia opiniaun. Purtantu, ba ida-ne’e laiha problema,” nia hateten.

Liga ba seguransa iha fronteira TL no Indonézia nian, nia esplika, oras ne’e F-FDTL no PNTL intensifika liután sira-nia patrullamentu iha área fronteira no forsa rua ne’e iha kolaborasaun di’ak ho autoridade no populasaun lokál hodi evita movimentu ema tama no sai ilegalmente iha área fonteira ne’ebé lori rizku propagasaun surtu COVID-19 iha rai-laran.

TATOLI

HAKEREK NO HATÁN

Please enter your comment!
Please enter your name here