Primeiru-Ministru, Taur Matan Ruak. Imajen Tatoli/Egas Cristovão

DILI, 04 agostu 2020 (TATOLI)-Tuir planu Governu sei aprezenta Orsamentu Jerál Estadu (OJE) tinan fiskál 2020 iha loron 15 setembru, tanba ne’e bainhira hetan aprovasaun, efetividade ezekusaun sei hahú iha novembru to’o dezembru 2020 de’it.

Maski ezekusaun iha fulan-rua de’it, maibé Primeiru-Ministru (PM), Taur Matan Ruak, apela ba ministériu hotu katak iha posibilidade tau osan  iha OJE 2020 ne’e hodi bele ezekuta ho di’ak tuir nesesidade, tanba iha nível orsamentu duodesimál ezekusaun menus.

“Apezar tinan 2020 ne’e, ministériu sira deside tau ona orsamentu iha Orsamentu Jerál Estadu 2020 ne’ebé prátikamente korresponde ba fulan-rua de’it, maibé laiha nesesidade atu halo  esforsu barak,” tenik Xefe Governu iha abertura jornada orsamentál 2021 ne’ebé realiza iha salaun Minsitériu Finansa (MF), Aitarak-Laran, tersa ne’e.

Tuir PM liña ministeriál sira presiza ezekuta OJE 2020 tuir nesesidade ne’ebé iha.

Iha loron 29 juñu, Governu liuhosi reuniaun Konsellu Ministru (KM) estraordinária aprova ona tetu proposta OJE ba tinan fiskál 2020 ho valór hamutuk millaun $1.492,3. 

Notísia Relevante: Governu Aprova Tetu Proposta OJE 2020 Millaun $1.492,3, Loron 15 Setembru Submete ba PN

Prioridade ne’ebé define ona iha OJE tinan ne’e maka estabilizasaun ba setór Sosiál ne’ebé foka ba saúde, edukasaun, formasaun, bee no saneamentu, estabilizasaun ba setór ekonómiku ho foka ba promosaun investimentu ba setór privadu, kriasaun ba empregu, agrikultura, no seguransa alimentár no polítika makro-ekonómiku, reforma ba administrasaun públika, ekonomia, sistema judisiáriu no jestaun ba finansa públika. 

Bazeia ba prioridade hirak ne’e, porsentu 33,8 hosi valór totál OJE sei aplika ba setór sosiál, porsentu 8 ba edukasaun, porsentu 15 ba protesaun sosiál, porsentu 11 ba saúde no porsentu 48,5 ba dezenvolvimentu ekonómiku no infraestrutura inklui medida ba estabilizasaun ekonómika iha ámbitu COVID-19 nian. 

Membru Governu sira aprova ona kalendáriu atu halo preparasaun ba OJE 2020, ne’ebé sei diskute no aprova filafali iha KM ba Proposta OJE 2020 finál, iha loron 26 agostu no sei submete ba Parlamentu Nasionál (PN) iha loron 15 setembru. 

Kalendáriu ba OJE 2021 nian, prevee katak KM bele apresia Proposta Lei ne’e iha loron 25 setembru no sei submete ba PN iha loron 15 outubru.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here