Governu realiza jornada orsamentál ba preparsaun OJE 2021, iha salaun Ministériu Finansa, Aitarak-Laran, tersa (04/08). Imajen/Florêncio Miranda Ximenes

DILI, 04 agostu 2020 (TATOLI)Hafoin Governu liuhosi desizaun Konsellu Ministru (KM) iha 29 juñu aprova proposta tetu Orsamentu Jerál Estadu (OJE) ba tinan fiskál 2020 ho valór hamutuk millaun $1.492,3 no halo ajustamentu ho prioridade kada ministériu, maka mosu tan proposta adisionál.

Ministru Finansa, Fernando Hanjam, informa daudaun ne’e Ministériu Finansa (MF) simu ona proposta adisionál hosi liña ministériu sira ho montante millaun $300.

“Tetu fiskál orsamentu 2020 ne’e ministériu hotu submete ona mai Ministériu Finansa no iha mós proposta adisionál hamutuk millaun $300, maibé seidauk finál tanba agora daudaun ekipa tékniku sira sei elabora hela,” tenik Ministru Fernando hafoin diskusaun jornada orsamentál 2021, ne’ebé realiza iha edifísiu Aitarak-laran, tersa ne’e.

Notísia Relevante: Governu Aprova Tetu Proposta OJE 2020 Millaun $1.492,3, Loron 15 Setembru Submete ba PN

Tuir governante ne’e, kona-ba proposta aumentu ne’e, ekipa tékniku MF sei haree no analiza didi’ak proposta sira ne’e razoavel ka lae tanba haree ba ezekusaun OJE 2020 bainhira hetan aprovasaun, prátikamente iha fulan novembru no dezembru de’it.

Hafoin MF elabora hotu maka aprezenta ba KM atu tetu didi’ak fali tanba agora iha hela Dotasaun Orsamentu Temporáriu (DOT) ne’ebé  tuir projesaun to’o outubru.

“Signifika ezekusaun OJE 2020 durante fulan-rua de’it no orsamentu ita tau ba selu kompromisu sira no obrigasaun sira ne’ebé ita la halo proposta foun,” nia akresenta.

Prioridade ne’ebé define ona iha OJE tinan ne’e,  maka estabilizasaun ba setór Sosiál ne’ebé foka ba saúde, edukasaun, formasaun, bee no saneamentu, estabilizasaun ba setór ekonómiku ho foka ba promosaun investimentu ba setór privadu, kriasaun ba empregu, agrikultura, no seguransa alimentár no polítika makro-ekonómiku, reforma ba administrasaun públika, ekonomia, sistema judisiáriu no jestaun ba finansa públika.

Bazeia ba prioridade hirak ne’e, porsentu 33,8 hosi valór totál OJE sei aplika ba setór sosiál, porsentu 8 ba edukasaun, porsentu 15 ba protesaun sosiál, porsentu 11 ba saúde no porsentu 48,5 ba dezenvolvimentu ekonómiku no infraestrutura inklui medida ba estabilizasaun ekonómika iha ámbitu COVID-19 nian.

Membru Governu sira aprova  ona kalendáriu atu halo preparasaun ba OJE 2020, ne’ebé sei diskute no aprova iha KM iha loron 26 agostu no sei submete ba Parlamentu Nasionál (PN) iha loron 15 setembru.

Kalendáriu ba OJE 2021 nian, prevee katak KM bele apresia proposta lei ne’e iha loron 25 setembru sei submete ba PN iha loron 15 outubru.

Jornalista: Florêncio Miranda Ximenes

Editor: Julia Chatarina

HAKEREK NO HATÁN

Please enter your comment!
Please enter your name here