Prezidente Autoridade Munisípiu Dili, Gaspar Soares, hamutuk ho MS no parseiru dezenvolvimentu hanesan UNICEF ho WFP halo sensibilizasaun prevensaun surtu COVID-19 ho surtu denge iha Merkadu Taibesi, kinta (30/04/2020). Imajen/Nelson de Sousa

DILI, 04 agostu 2020 (TATOLI)-Relasiona ho kazu pozitivu COVID-19 foun iha Timor-Leste, Autoridade Munisípiu Dili, iha loron 06 fulan-agostu ne’e sei deklara hodi re-ativa Komisaun Munisipál ba prevensaun moras mundiál coronavirus.

”PNTL sira sei kontinua pasa revista  ba sidadaun hotu ne’ebé mak la kumpre regras COVID-19 nian,”informa Prezidente Autoridade Munisípiu Dili, Gaspar Soares ba jornalista sira iha edifísiu Ministériu Finansa Aitarak-Laran Dili.

Antes re-ativa komisaun ne’e, iha loron 06 fulan ne’e sei halo uluk enkontru ida entre instituisaun relevante iha Komandu PNTL Munisípiu Dili.

”Agora daudaun moras ne’e iha ona ita-nia ra’in ohin mós ha’u ko’alia ho Diretora Jerál Prestasaun Saúde katak kazu iha duni, tanba ne’e husu ba ita hotu atu atensaun ba ida ne’e,” tenik Gaspar.

Maibé nia kestiona maka falta bee moos ne’ebé akontese iha fatin instalasaun fase liman sira iha Dili nian hanesan área merkadu Manleuana, Taibesi, Aitarak-Laran, Audian no fatin seluk tan.

”Kona-ba fasilidade fase liman nian iha públiku nafatin iha maibé problema ho bee ha’u fó ezemplu hanesan iha Postu Administrativu Metinaro no mós fatin seluk defisil tebes atu hetan bee moos entaun agora kazu foun iha ona oinsá mak bele koordena ho saneamentu para tulun Munisípiu Dili atu hadi’a fatin públiku sira ne’ebé mak bee laiha,” nia hateten.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here