Ministru Finansa, Fernando Hanjam akompaña ho Diretór sira, halo konferénsia imprensa hafoin diskusaun jornada orsamentál 2021, iha salaun Ministériu Finansa, Aitarak-laran. Imajen/Florêncio Miranda Ximenes

DILI, 04 agostu 2020 (TATOLI)Iha diskusaun jornada orsamentál, Ministériu Finansa (MF) aprezenta senáriu haat ba tetu fiskál Orsamentu Jerál Estadu (OJE) 2021 ba kada ministériu no ajénsia Estadu sira hodi hahú define no elabora planu prioridade.

Ministru Finansa, Fernando Hanjam, informa  jornada orsamentál ho objetivu atu define prioridade nasionál no determina tetu fiskál OJE 2021.

Senáriu dahuluk, maka sustentável aumenta reseita naun petrolíferu ho ninia montante millaun $724,4, ho previzaun ida katak fundu petrolíferu lori tinan naruk mak hotu ne’ebé sei la foti liu Rendimentu Sustentável Estimadu (RSE).

Daruak, sénariu moderadu ho ninia montante biliaun $1,309 ne’ebé défise ajustadu ho RSE millaun $585,2, ho previzaun fundu mina-rai sei hotu iha tinan 2045.

Datoluk, sénariu ne’e a’as oituan ho montante biliaun $1,600 ne’ebé ajusta ho RSE millaun $711,0, ho privizaun fundu mina-rai ramata iha tinan 2037.

Senáriu ikus liu, ho montante biliaun $1,782,9 ne’ebé ajusta mós RSE millaun $890,9 ho previzaun fundu mina-rai sei ramata iha tinan 2039.

“Ida-ne’e foin senáriu, maibé seidauk iha desizaun finál tanba sei tetu halo didi’ak hafoin ekipa tékniku Ministériu Finansa no ekipa liña ministeriál sei tuur hamutuk hodi elabora sai proposta no sei lori ba konsellu Ministru atu halo diskusaun no aprovasuan,” tenik Ministru Fernando hafoin diskusaun jornada orsamentál 2021, ne’ebé realiza iha edifísiu Aitarak-laran, tersa ne’e.

Programa no planu VIII Governu ninian inklui tetu fiskál OJE 2021, ho baze hosi Planu Estratéjiku Dezenvolvimentu Nasionál (PEDN) períodu 2011 to’o 2030.

Maski nune’e, diskusaun jornada orsamentál ne’e seidauk iha desizaun finál maibé hanesan fahe informasaun atu liña ministeriál hotu bele tetu senáriu ne’ebé bele ajuda dezenvolvimentu nasaun ne’e iha situasaun surtu COVID-19.

Aprezentasaun foku ba ajenda tolu

Ministru haktuir, iha aprezentasaun ohin foku liu ba ajenda tolu hanesan, dahuluk diretiva no objetivu dezenvolvimentu liuhosi aprezentasaun programa prioridade no meta prisipál sira inklui orsamentasaun programátiku, daruak maka avaliasaun ba dezempeñu dezenvolvimentu liuhosi setór sosiál, ekonómiku no fiskál no ikus liu maka orsamentasaun ba 2021 liuhosi tetu fiskál.

“Ohin aprezentasaun naruk tebes kona-ba matéria sira ne’e di’ak tebes atu ajuda liña ministeriál sira hodi define prioridade sira no define tetu fiskál iha OJE 2021,” nia akresenta.

Ministru Finansa informa kona-ba Komisaun Planu Rekuperasaun Ekonómiku ohin halo aprezentasaun planu atu liña ministeriál sira bele tetu hodi responde no rekuperasaun ekonómika iha situasaun surtu COVID-19.

Liña orientasaun ba 2011 to’o 2023 iha ligasaun entre prosedimentu ba planeamentu no orsamentu, integrasaun ba esforsu inter- ministeriál no programa transversál sira no rezolve problema povu nian ho lalais, garantia partisipasaun no sentimentu pertense hosi povu, inklui hetan apoia populár ba serbisu defeza, seguransa no interese estratéjiku.

Iha 2021 to’o 2023, prioridade prisipál ba VIII Governu hanesan moris di’ak, protesaun sosiál no sidadania, investe iha área ekonomia no finansa públika, mellora konetividade nasionál, konsolida no hametin defeza, seguransa no relasaun esterna inklui konsolida no hametin justisa demokrasia no direitu umanu.

Enkuantu, meta ne’ebé Governu hakarak atinje iha 2019-2023 (sujeitu ba revizaun) maka hanesan kresimentu ekonómiku ne’ebé bele atinje porsentu hitu no inflasaun menus hosi porsentu haat, kria 60.000 kampu serbisu ba kada tinan no rásiu reseita doméstika ba Produtu Internu Bruto (PIB) bele sa’e to’o porsentu 15 iha 2023.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here