Asaun pasífiku ne'ebé organiza husi FMTL, FONGTIL ho AJTL ezije ba Governu atu retira ezbosu lei kriminaliza difamasaun, tersa (04/08/2020). Imajen/António Gonçalves

DILI, 04 agostu 2020 (TATOLI)-Asaun pasífiku ba loron daruak nian, segunda-tersa (03-04/07), kontinua reklama no ezije ba Governu liuhosi Ministériu Justisa (MJ) atu retira ezbosu lei kriminaliza difamasaun.

Notísia Relevante : Asaun pasifika kontra ezbosu lei kriminaliza difamasaun mantein paz

Asaun pasifika ne’ebé organiza husi FMTL, FONGTIL no AJTL ezije Governu atu retira ezbosu lei kriminaliza difamasaun. Tersa (04/08/2020). Imajen/António Gonçalves

Asaun pasífiku ne’ebé hala’o iha arredores Universidade Nasionál Timor Lorosa’e (UNTL) ne’e organiza hosi Front Mahasiswa Timor-Leste (FMTL), Forum ONG Timor-Leste (FONGTIL) no Asosiasaun Jornalista Timor-Leste (AJTL).

Tuir observasaun Agência Tatoli nian iha terrenu nota katak manifestante sira ne’ebé maioria juventude  kontinua lori espanduk hakerek ho letra mean no metan iha hena-mutin no hena-mean kuadradu ezije maka’as atu Governu retira ezbosu lei kriminaliza difamasaun tanba ezbosu lei refere la pertinente atu implementa iha  Timor-Leste hanesan estadu direitu no demokrátiku.

Polísia Nasionál Timor-Leste (PNTL) mós fó seguransa  ba asaun pasífiku ne’e  la’o ho di’ak liu tan labele iha infiltrasaun ruma

“Asaun pasífiku ohin loron tama ba faze daruak, ami kontinua mobiliza kamada sosiál hotu hodi defende no luta ba injustisa sosiál  hodi husu Ministru Justisa, Manuel Cárceres da Costa, atu retira tiha ezbosu lei ne’e,” hateten Porta voz FMTL, Novelino dos Santos.

Nia hateten, Ministru Manuel Cárceres da Costa, foin lalais deklara ona liuhosi televizaun ida katak kriminaliza difamasaun agora la  iha prioridade ona.

“Ami hanoin deklarasaun ministru nian ne’e  verbal de’it seidauk deklara fó afirmasaun ba públiku ho loloos, tanba ne’e presiza afirmasaun ba públiku loloos katak retira ka la avansa duni ona ho ezbosu  lei ne’e,”  Novelino dos Santos hateten.

Asaun pasifika ne’ebé organiza husi FMTL, FONGTIL no AJTL ezije Governu atu retira ezbosu lei kriminaliza difamasaun. Tersa (04/08/2020). Imajen/António Gonçalves

FMTL mós hatama ona karta petisaun ba Ministru Justisa kuandu iha ona resposta, sira-nia parte sei hapara asaun pasífiku refere.

Agência Tatoli tenta konfirma ho Ministru Justisa Manuel Cárceres da Costa, hafoin partisipa iha retiru  membru oitavu Governu iha Ministériu Finansas, kona-ba ejijénsia asaun pasífiku sira nian ne’e, maibé Ministru Cárceres lakohi fó komentáriu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here