Osan Dolar Amerikanu. Imajen/Google

DILI, 03 agostu 2020 (TATOLI)-Tribunál Distritál Dili (TDD), ohin, kontinua halo audiénsia julgamentu ba kazu krime administrativu danoza, pekulatu no falsifikasaun agravadu ne’ebé akontese iha Ministériu Edukasaun.

Notísia Relevante : Deskonfia, Kargu Xefia Na’in-Tolu iha ME Halakon Osan Estadu $40,197.50

Iha audiénsia julgamentu ne’e , TDD rona sasin ka testemuña sira hodi konfirma envolvimentu arguidu na’in-tolu hosi ajente públiku nian no asume mós kargu xefia   iha Ministériu Edukasaun liuhosi Diresaun Nasionál Ensinu Rekorrente ne’ebé halakon osan Estadu ka fó prezuiju Estadu ho valor osan $40,197.50.

Arguido na’in tolu, kompostu husi   arguidu FLDRB , arguida HNDA  no arguidu JV ne’ebé okupa kargu xefia iha Diresaun Nasionál Ensinu Rekorrente, Ministériu Edukasaun.

Tuir alegasaun Ministériu Públiku nian katak Iha tinan 2007, arguidu FLDRB hanesan Diretór Nasionál ba Diresaun Ensinu deside hodi fó aluga fatin dormitóriu, aula/salaun, meza no kadeira ne’ebé mak eziste iha Diresaun Ensinu Rekorrente ba públiku no ONG sira hodi uza.

Tanba Diresaun ida ne’e submete ba Ministériu Edukasaun, ho nune’e Ministériu refere estabelese ekipamentu ka mobiliáriu sira iha fatin dormitóriu nian no halo reabilitasaun ba auditóriu ka salaun sira iha Diresaun Nasionál Rekorrente nian ho objetivu hodi uza ba halo atividade sira iha relasaun ho servisu Ministériu Edukasaun nian.

Iha tinan-2007, arguidu FLDRB  foti desizaun hodi fó aluga fatin ne’e ba públiku, ho inisiativa rasik sein fó koñesimentu ba Ministru Edukasaun nu’udar arguidu nia superiór.

Atu fasilita servisu ida ne’e, arguidu FLDRB, deside no indika arguidu JV nu’udar responsavel hodi tau matan ba reseita sira ne’ebé mak hetan husi atividade alugér ne’e.

Arguidu JV mak kria oráriu no tarefa ba alugér nian, prepara dokumentu reseita nian hanesan fatura, resibu  no nota kompras ka despeza nain, liuhusi autorizasaun arguidu FLDRB.

Arguidu JV prepara dokumentu sira hanesan temi iha leten, sein konsulta ho Diresaun Finansas no Aprovizionamentu, Ministériu Edukasaun nian.

Hafoin prepara tiha dokumentu sira ne’e, hahú husi setembru-2007, atividade alugér ne’e komesa la’o no to’o iha dezembru 2010, mak atividade refere para tanba hetan intervensaun husi Ministru Edukasaun.

Totál reseita ne’ebé hetan husi atividade alugér ne’e, hahú husi setembru  2007 to’o dezembru 2010, purvolta $40. 157.050 depozita iha Banku Mandiri  ho konta-Bankária rua (2); ida) arguidu JV, QQ Edukasaun naun formal ho númeru Konta Bankária 601-00- 0024253-0; 2). arguidu JV, QQ Edukasaun naun Formal ho númeru Konta Bankária 601- 00-0044475-5.

Kriasaun konta bankária rua ne’e inisiativa husi arguidu FLDRB  nian no arguidu mak autoriza arguidu JV uza nia naran hodi estabelese konta bankária rua ne’e. Durante osan sira ne’e rai iha konta bankária rua ne’e, arguidu  FLDRB  ho arguidu JV mak halo jestaun, no arguidu JV mak iha direitu tomak hodi movimenta osan sira-ne’e.

Reseita sira hetan husi atividade ne’e, hahú husi 2007 to’o 2010, nia deskrisaun hanesan relata mai ne’e: 1. 2007 iha setembru ($3.429.00), outubru ($407.00), novembru  ($899,00), dezembru  ($348) ho total $5,083,00.

Iha janeiru 2008 ($270,00), fevereiru ($260,00), marsu ($300,00), abríl ($3.480,00),  maiu ($3.518,00), juñu ($625,00), jullu ($600,00), Agostu ($520,00), outubru ($655,00), dezembru ($2.354,00) no total $12.582,00

Iha janeiru 2009 ($100,00), marsu ($3.880,00), maiu ($4.290,00), juñu $12.00, agostu ($140,00), setembru ($150,00), outubru (-), novembru ($176,00), dezembru ($100,00) no total $15,907,00.

 Iha janeiru  2010 (-), fevereiru  ($1, 450,00), marsu ($51. 894,00), maiu $156.00, agostu ($124,00), setembru ($206,00), novembru ($1,450.00), dezembru ($100,00) no total $3,975,00 16

Haktuir relatóriu sita katak  arguidu FLDRB orienta arguidu JV hodi halo levantamentu ba osan ho montante $37.701, 80 hodi gasta ba atividade sira iha Diresaun Nasionál Rekorrente nian.

Arguidu  FLDRB    mós autoriza arguidu JV hodi uza osan ho montante $4.379, hodi konstrui armazén ida iha Diresaun Nasional Ensinu Rekorrente.

Konstrusaun ba armazén ne’e rasik la liuhusi intervensaun Ekipa Aprovizionamentu no Lojístika Ministériu Edukasaun nian, arguidu sira mós la aprezenta kona-ba kompañia ne’ebé mak halo konstrusaun ida ne’e.

Arguidu  FLDRB  mak kontaktu direita badaen na’in-rua  (2) hodi konstrui armazén ne’e ho osan reseita naun fiskál.

Arguidu FLDRB  ho JV utiliza montante $2, 381,00 (ba atividade viajen lokál ne’ebé mak lei finanseiru la admite no arguidu sira la aprezenta dokumentu komprovativu sira kona-ba viajen lokál nian.

Arguidu sira  mós hateten katak funsionáriu sira iha Diresaun Nasionál Ensinu Rekorrente nian empresta tiha osan ne’ebé mak hetan husi resita ne’e ho montante  $1.500, 00, maibé arguidu sira la justifika ho dokumentu legal ruma no osan refere to’o agora la hatene nia paradeiru.

Iha relatóriu mós deteta katak arguidu sira uza osan ho montante $154, 080,00 sein justifika ho dokumentu ruma. Nune’e mós Iha loron 23 novembru 2009, arguidu FLDRB  mós fó orientasaun ba arguida HNDA hodi utiliza osan reseita naun  fiskál hamutuk $750,00 hodi halo reparasaun/manutensaun ba karreta Land Cruiser ho xapa matrikula 20-469 G.

Aleinde ida ne’e arguidu JV mós entrega osan ho montante $350,00  ba arguida HNDA hodi selu arguida nia oan nia eskola iha Indonézia.

Akontese mós katak, haktuir dokumentu iha relatóriu  ne’e, arguidu sira uza resita naun fiskál hodi sosa material eskritóriu nian, kombustivel, trata dokumentu tránzitu iha fronteira, aluga transporte, sosa tiketi ró nian atu ba Oe-cuse, sosa material hariis-fatin nian, sosa konsumu ba funsionáriu husi Diresaun Rekorrente nian, sosa sigarru no serveja.

Haree husi relatóriu ne’e, deteta momoos katak utilizasaun orsamentu ba item sira temi iha akuzasaun tuir loloos tama ona iha verba Ministériu Edukasaun nian ne’ebé mak Governu aloka ba iha kada Ministériu idak-idak, arguidu sira la devia uza osan ne’ebé mak mai husi reseita  naun  fiskál ne’e hodi rezolve kestaun sira-ne’e.

Arguidu sira la aprezenta detallu relatóriu kona-ba rekolla reseita no relatóriu gastu nian, tanba dezde inísiu arguidu sira la prepara relatóriu refere, apenas iha de’it livru reziste osan tama no sai ne’ebé mak antes ne’e arguidu sira prepara ona iha resibu, fatura no nota despeza sira.

Tuir loloos reseita hotu-hotu ne’ebé mak Diresaun Nasionál Ensinu Rekorrente hetan tenke relata ba superiór ka ierárkiku hodi entrega ba Diresaun Nasionál Finansa Ministériu Edukasaun nian no fundu  ne’e hatama direita ba konta Governu nian.

Arguidu sira la presiza kria tan konta bankária foun, maibé  saida mak akontese kontráriu arguidu  FLDRB  fó orden verbal ba arguidu JV no arguida HNDA hodi rekolla reseita naun fiskál liuhusi fó aluga fatin sira hanesan Salaun/aula, dormitóriu, refeitóriu, kadeira no meza ba sidadaun, NGO no instituisaun Estadu  sira ne’ebé presiza sein intervensaun husi Diresaun Finansa no Lojístika, Ministériu Edukasaun nian.

Konsekuénsia direita no nesesáriu hosi hahalok arguidu sira nian ne’e Estadu Timor-Leste hetan prejuizu hamutuk $40,197.50  no husi rezultadu sira iha leten, demonstra katak arguidu sira la kumpre manual Orsamentu Jerál no sistema Aprovizionamentu normal iha Ministériu Edukasaun nian.

Ba prosesu julgamentu MP  promove arguidu FLDRB  nu’udar ko-autór materiál ho forma konsumada ba iha konkursu real ba krime administrasaun danoza, pekulatu ho falsifikasaun agravadu, previstu no punidu iha artigu 274 n. 2, 295 n.3 no art.304 n.2 hotu-hotu husi Kódigu Penál

Arguida  HNDA ho JV nu’udar ko-autór material ho forma konsumada ba iha konkursu real ba krime pekulatu ho falsifikasaun agravadu, previstu no punidu iha artigu 2749 n.2, 295 n.3 no art 304  n.2  husi Kódigu Penál.

Iha depoimentu liu hosi audiénsia julgamentu ne’e sasin ho inisiál N nu’udar funsionáriu lojístika servisu iha Diresaun Ensinu Rekorrente, husi 2003 to’o agora  ne’ebé servisu hamutuk ho arguidu sira iha diresaun refere iha 2008-2010, konfesa ba Tribunál katak, alugér ba fatin salaun no dormitóriu la’ós arguidu na’in- tolu mak inisia, maibé antes arguidu sira seidauk assume kna’ar iha ensinu rekorrente iha diretór anterior antes ne’e aplika ona alugér refere.

Nia hateten, normálmente salaun ne’e fó ba ema ne’ebé hakarak aluga hodi utiliza ba hala’o programa  workshop ruma no dormitóriu mós hanesan  ba toba fatin ba professor sira hosi munisípiu mai iha Dili atu tuir formasaun ruma bele utiliza hodi toba inklui ema seluk ne’ebé hakarak utiliza .

Dormitóriu ne’e rasik iha kuartu boot neen (6)  kada kuartu ema na’in-15 ka na’in- 20 mak toba iha laran.

Nia dehan, kona-ba pagamentu sira alugér bainhira ema ne’ebé aluga sempre hala’o pagamentu direita ba sira-nia parte finansas liuhosi arguidu J.

Sasin seluk ho inisiál FDS hanesan funsionáriu iha ensinu rekorrente Ministériu Edukasaun, nu’udar asistente finansas  hateten, nia parte hahú servisu iha ensinu rekorrente hahú  iha 2006 no iha 2007  servisu hamutuk ho diretór finansas ho inisiál JP  iha momentu ne’ebá maibé to’o iha 2011 diretór ne’e mate ona.

Nia mós friza katak, iha momentu ne’ebá arguidu sira la loke konkursu maibé bolu direita de’it hodi hatudu ema  hodi halo reabilitasaun ba armazén ida iha ensinu rekorrente tanba ho karater urjénsia hodi tau sasán sira.

Hafoin rona tiha deklarasaun ne’e, Tribunál liuhosi juiz koletivu Maria Modesta, João Ribeiro no Maria Solana, deside adia fila-fali julgamentu ne’e ba iha loron  31 agostu, tinan ne’e, iha tuku 09:30  Otl, hodi rona sasin sira seluk.

Jornalista  : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here