Parada hosi membru F-FDTL. Imajen/ António Goncalves

LIQUIÇÁ, 03 agostu 2020 (TATOLI)—Forsa Defeza Timor-Leste (F-FDTL) liuhosi Komponente Navál destakadu no Konsellu Juventude Timor-Leste (CNJTL-sigla portugés) munisípiu Liquiça hahú halo preparasaun hodi selebra loron Forsa Armada Libertasaun Nasionál Timor-Leste (FALINTIL) ba dala-45 (20 agostu 1075-20 agostu 2020). 

Notísia Relevante: F-FDTL sei komemora loron FALINTIL ho atividade “Tour FALINTIL 2020”

Molok realiza abertura, CNJTL Munisípiu Liquiça no Komponente Navál husu autorizasaun ba autoridade munisipál no autoridade munisípiu refere apoia inisiativa ne’e.

Prezidente Autoridade Munisípiu Liquiçá, Domingos da Conceição dos Santos “Makaro”, fó apresiasaun ba Komponente Navál no CNJTL ne’ebé hahú organiza hodi halo preparasaun ba loron istóriku ida-ne’e.

“Ha’u hakarak hato’o parabéns ba inisiativa hosi Prezidente Juventude no Komponente Navál destakadu ne’ebé inísia hanoin halo preparasaun hodi komemora loron FALINTIL 20 agostu. Mai ita fó apresiasaun ba inisiativa ne’e. Tuir loloos orsamentu ba komemorasaun ne’e iha miabé laiha entaun ho maneira sira bele halo tanba ema dehan “tidak akar akar rotan pun jadi” naran halo tún halo sa’e, importante halo netik divertimentu ruma ba ita-nia sosiedade iha ámbitu loron FALINTIL ne’e,” Prezidente Autoridade Munisípiu Liquiça, Domingos da Conceição dos Santos “Makaro”, ko’alia bainhira hala’o abertura ba preparasaun iha Jardín Hale-Lulik, Dailor, Liquiçá, sábadu ne’e.

Iha biban hanesan, Prezidente Konsellu Veteranu Munisípiu Liquiça, Vicente da Conceição “Rai Los”, apresia ho inisitiva ne’ebé Komponente Navál destakadu no CNJTL Munisípiu Liquiça ne’ebé halo koordenasaun hodi halo preparasaun molok tama ba 20 agostu.

F-FDTL no juventude Liquica halo preparasaun ba selebra loron FALINTIL ba dala-45. Imajen/Evaristo Soares Martins.

“Ha’u hanesan reprezentante veteranu iha ne’e apresia ho F-FDTL atraves Komponente Nával destakadu no konsellu juventude. Ohin, ita halo abertura ba loron FALINTIL nian ne’ebé ita sei selebra iha 20 agostu, ha’u fó apresiasaun boot ba Komandante Navál destakadu no Prezidente Konsellu Juventude ne’ebé halo proposta ba autoridade no hetan autorizasaun. Ha’u urgullu no apresia ho esforsu ne’ebé ke ema hotu-hotu labele halo, só ema ne’ebé iha duni vontade no iha duni domin boot ba loron FALINTIL nian mesmu la hetan apoia fundu ruma hosi governu,” Rai Los hateten.

Prezidente Komisaun Organizadora atuál Prezidente CNJTL Munisípiu Liquiçá, Laurindo dos Santos. Imajen/Evaristo Soares Martins.

Prezidente Komisaun Organizadora atuál Prezidente CNJTL Munisípiu Liquiçá, Laurindo dos Santos, esplika koordenasaun ho Komponente Navál destakadu hala’o ona durante fulan ida no ohin halo abertura.

Prezidente KO ne’e fó-sai katak, molok halo abertura halo ona koordenasaun ho veteranu, autoridade lokál, autoridade seguransa (PNTL), igreja no maioria konkorda maske laiha orsamentu tanba loron ne’e importantísimu iha prosesu luta ba libertasaun nasionál.

“Laiha sentavu-ida hosi Governu ba atividade ne’e tanba ita hatene oras ne’e ita-nia estadu finánsia ho duodesimál, tanba ne’e mak ha’u ho Komandante Navál destakadu hamosu ideia oinsá mak bele halo netik buat ruma iha loron istóriku ne’e”, dehan nia ba Agência TATOLI, ohin.

Xefe Juventude ne’e hateten, loron istóriku ne’e selebra ho espozisaun hanesan bola guling, futu-manu, jogu desportu entre autoridade defeza no seguransa, jogu amizadeliuhosi futeból entre feto Liquiçá ho Malina.

“Komponente Navál oferese bee-moos ne’ebé sira rasik kria liga sanak ida ba komunidade Leopa, Suku Dato, Liquiçá Vila, ne’ebé hetan kontribuisaun ho maun Vasco ne’ebé halo ligasaun ho ajénsia sira ajuda hodi hamutuk ho jovens sirakria tanke bee-moos ida iha área ne’ebá (Leopa), tanke bee-moos sei inaugural iha 20 agostu,” Xefe Juventude ne’e hateten.

Prezidente Komisaun Organizadora ne’e anunsia ba Liquiça-oan sira katak hahú hosi ohin kalan to’o 19 agostu kalan sei kontinua sensibiliza informasaun kona-ba prevensaun propasaun COVID-19 nian ba komunidade.

“Sé-sé mak suporta iha atividade ne’e mak hanesan Liquiçá-oan balun, jovens sira, ita-nia forsa sira iha komponente navál tau hamutuk dollar $1 no dollar $2 hodi hahú halo preparasaun ba eventu importante ne’e,” nia dehan. 

Nia dehan, hahú hosi loron 10 agostu ba leten sei hasai karta konvite ba autoridade sivíl no militár, posibilidade bele to’o baze hodi halo festa boot iha 20 agostu.

“Ha’u hanesan Prezidente Komisaun Organizagora sei esforsu hodi halo festa boot no ha’u fiar katak autoridade sei mai hotu, ami laiha osan maibé iha hanoin hodi buka tún sa’e,” nia hateten. 

Tuir observasaun Agência TATOLI, hafoin termina abertura Jardín Hali-Lulik, Dailor, Liquiçá, lian sira fahe bua-malus ba autoridade defeza, seguransa, komunidade no juventude hanesan matak-malirin, haan na’an lulik molok kontinua ajenda preparasaun hodi selebra loron FALINTIL ba dala-45 ne’e.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here