Traballadór sira hatun foos iha Portu Dili. Imajen Tatoli/António Gonçalves

DILI, 03 agostu 2020 (TATOLI)-Governu liuhosi reuniaun Konsellu Ministru estraordinária iha loron 21 maiu, delega ona kompeténsia ba Prezidente Sentru Lojíztika Nasionál (CLN, sigla portugés), Agusto Junior Trindade hanesan reprezentante Governu nian ne’ebé maka iha kompeténsia bele selebra kontratu ho Governu Repúblika Sosialista Vietname hodi halo akizisaun foos tonelada 30.000, ho orsamentu hamutuk millaun $15.

Prezidente CLN, informa parte CLN no Autoridade Aduaneira (Alfádega) halo ona reuniaun koordenasaun atu ko’alia kona-ba preparasaun atu simu akizisaun foos tonelada 30.000 hosi Vietname, ne’ebé tuir planu sei to’o iha tempu badak nia-laran.

“Ohin tuku sanulu maka ami hosi CLN halo enkontru ho Alfándega no asosiasaun sira ne’ebé iha Alfándega nia okos hodi deskute oituan kona-ba kustu ba estivadór sira, foos tama karik ninia transportasaun foos husi portu Dili ba armajen Tibar ne’e oinsá, tanba foos komesa sai ona hosi Vietname,” tenik Dirijente ne’e ba Agência Tatoli via telefónika, segunda ne’e.

Tuir nia transportasaun foos hosi Vietname mai Timór maizumenus han tempu semana rua.

“Espera iha loron 16 ka 17 agora foos sira ne’e sei to’o iha Timor-Leste. Tanba prosesu trasportasaun foos hosi Vietname to’o mai ita-nia rai presiza han tempu semana rua,” nia akresenta.

Prezidente CLN esplika, prosesu transportasaun foos sei halo iha faze rua.

“Akizisaun foos hamutuk  tonelada 30.000 no sei transporta husi Vietname dala-rua mai Timor-Leste. Faze dahuluk foos tonelada 18.500, ne’ebé sei okupa  ró rua no ró ida sei tula foos tonelada  6.000, enkuantu ró seluk sei tula foos tonelada 12.500. Importasaun foos ba faze daruak hamutuk tonelada 11.500,” nia subliña.

Jornalista: Natalino Costa

Editora: Julia Chatarina  

 

HAKEREK NO HATÁN

Please enter your comment!
Please enter your name here