Ministru Petróleu no Minerál, Víctor da Conceição Soares. Imajen Tatoli/Egas Cristovão

DILI, 03 agostu 2020 (TATOLI)Ministru Petróleu no Minerál, Víctor da Conceição Soares, hateten atividade empreza fábrika simentu, TL Cement daudaun ne’e pendente hela tanba iha situasaun surtu COVID-19 ne’ebé afetadu ba nasaun hotu.

“Kona-ba fábrika simentu ne’e pendente tanba COVID-19, desde ha’u asume kargu hanesan ministru mai iha situasaun surtu COVID-19, Austrália lockdown no ita mós hanesan, tanba ne’e ita seidauk hatene bainhira maka pandemia globál ne’e hotu atu projetu ne’e bele hahú filafali,” tenik Ministru Víctor iha edifísiu Ministériu Finansa, Aitarak-Laran, segunda ne’e.

To’o agora ministru ne’e seidauk hasoru dirijente TL Cement hodi akompaña progresu atividade projetu simentu ne’e.

“Ha’u sidauk hasoru dirijente ruma atu ko’alia kona-ba projetu TL Cementhv. Maibé tempu badak espera situasaun ne’e bele la’o ho normál atu sira bele hala’o atividade normál,” nia akresenta.

TL Cement sei harii fábrika simentu besik zona luan ne’ebé nakonu ho ahu-ruin (kalkáriu) ho kualidade a’as iha rejiaun Baucau no sei halo produsaun ba simentu iha faze bázika fábrika nian (clínquer) ba esportasaun no simentu ba abastesimentu konstrusaun sivíl iha Timor-Leste.

Komunidade lokál maka sei sai benefisiáriu dahuluk husi projetu ne’e no sei abranje objetivu boot tolu Governu nian kona-ba reforma ekonómika sira hanesan aumenta investimentu privadu, promove diversifikasaun ekonómika no promove empregu sustentável.

Governu asina ona mós sertifikadu investimentu nian ho L & S Unipessoal (otelaria), ho Palm Spring Hotel Lda. inklui ho Stamford Medical Lda.

Projetu ne’e rasik, sei uza mós enerjia renovável husi Alemaña hodi la kontribui poluisaun.

Iha 2018, Governu liuhosi reuniaun Konsellu Ministru estraordináriu aprova rezolusaun ba akordu sosiál ida ho kompañia Timor-Leste, TL Cement hodi aselera prosesu ba implementasaun fábrika simentu iha Munisípiu Baucau hodi loke servisu ba joven sira pur volta 300 iha faze dahuluk, hafoin kontinua to’o 1.000-resin.

Proposta Governu ba Orsamentu Jerál Estadu (OJE) 2019 propoin mós orsamentu millaun $500 ba partisipasaun Estadu ba investimentu ne’e.

Ho orsamentu ne’e, Governu sei kontribui porsentu 40 maibé fazeadamente, ne’ebé faze dahuluk millaun $150 hodi bele avansa prosesu ba oin no fó konfiasaun ba fundasaun ho investimentu ba Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here