DILI, 02 agostu 2020 (TATOLI)-Sarani katólika iha Suku Muapitine, Postu Administrativu Lospalos, Munisípiu Lautém entrega rai ektare-rua ba kongregasaun Carmelita atu konstroe rezidénsia koléjiu Madre Carmelita.
Amo Bispo Diocese Baucau, Basílio do Nascimento, hamutuk ho Amo Parokia São Paulo Lospalos no Madre Carmelita sira hahú observa rai ne’ebé komunidade no líder komunitáriu oferese ba igreja.
“Ita-nia Amo Bispo Basílio agradese autoridade suku no sarani katólika iha Suku Muapitine, liuliu sarani tomak iha munisípiu Lautém, tanba oferese rai ektare-rua ba Madre Carmelita sira,” tenik Xefe Suku Muapitine, Lívio Mendes ba Agência Tatoli via telefónika, domingu ne’e.
Líder Komunitáriu ne’e dehan, hafoin hala’o dezeñu maka sei halo konstrusaun.
Sarani katólika iha Suku Muapitine sente orgullu no agradese ba Amo Bispo sira tanba bele mai vizita fatin ne’e
“Ami ho esperansa tomak bele harii duni rezidénsia ka asrama iha sarani Muapitine nia le’et atu hasa’e morál no espirituál inklui edukasaun ba sarani iha suku ne’e,” Livío Mendes subliña.
Komunidade Muapitine mós prontu apoia Madre Carmelita sira bainhira halo konstrusaun ba rezidénsia ne’e.
Seremónia entrega rai ba Madre Carmelita ne’e partisipa husi Amo Bispo Dioseze Baucau, Basílio do Nascimento, Amo Parókia Lospalos, Madre Carmelita sira, autoridade lokál, inklui Sarani Muapitine.
Jornalista: Florêncio Miranda Ximenes
Editora: Julia Chatarina
