Ministru Turizmu, Komérsiu no Indústria, José Lucas do Carmo da Silva, vizita merkadu foun Baucau, iha Baucau Villa, sesta (31/07). Imajen/Natalino Costa

BAUCAU, 02 agustu 2020 (TATOLI)Ministru Turizmu, Komérsiu no Indústria, José Lucas do Carmo da Silva, halo vizita kortezia ba merkadu foun Baucau hodi haree direta progresu no daudaun ne’e sei iha faze konstrusaun maibé kuaze ramata.

“Merkadu ne’e seidauk finaliza, sei iha faze konstrusaun maibé atinje ona porsentu 95, falta lutu protesaun, eletrisidade, sanitasaun inklui bee-moos maka seidauk iha maibé kuandu kompletu ona maka negosiante sira bele uza ona fatin ne’e,” tenik Ministru José Lucas, sesta (31/07), iha merkadu Baucau.

Governante ne’e dehan, bainhira konstrusaun finaliza ona maka parte Autoridade Munisípiu Baucau sei halo aprosimasaun ho negosiante sira hodi bele prenxe fatin iha merkadu foun.

Tuir Ministru, merkadu ne’ebé foin maka harii ne’e hanesan alternativu hosi Autoridade Minisípiu Baucau atu re-aloka negosiante 700 resin iha Baucau Kota Lama no Kota Baru, atu ba fali merkadu foun.

Konstrusaun ba merkadu foun ne’ebé lokaliza iha Baucau Villa ne’e toma konta hosi kompañia Ideal Construction Unip,LDA ho orsamentu ba konstrusaun hamutuk $57.620,15.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here