Enkontru ekipa USJTL ho Ministra Turizmu Komunitáriu no Kulturál, Inácia da Conceição Teixeira, iha salaun Memorial Hall, Farol. Imejen/USJTL

DILI, 31 jullu 2020 (TATOLI)-Prezidente Unidade Sientista Jeolojia Timor-Leste (USJTL), Maurício da Silva, hamutuk ho ekipa hasoru malu Vise-Ministra Turizmu Komunitáriu no Kulturál, Inácia da Conceição Teixeira, hodi halo aprezentasaun kona-ba mapeamentu no identifikasaun patrimóniu turíztiku iha Timor-Leste.

Tuir dadus ne’ebé rekolla, iha munisípiu neen hanesan Lautém, Baucau, Dili, Ainaro, Ermera, no Bobonaro, identifika katak objetu turíztiku hamutuk 245 maka USJTL rejistu ona iha mapa.

“Objetu turíztiku hirak-ne’e halo bazeia ba klasifikasaun patrimóniu turíztiku hanesan Ekoturizmu, Agroturizmu, Jeoturizmu, Turizmu Istorikál, Turizmu Kulturál, Turizmu Relijiozu, Turizmu Kulinária, no Turizmu Nomadiku,” refere nota ne’ebé Agência Tatoli asesu, sesta ne’e.

Hafoin rona aprezentasaun, Vise-Ministra Inácia apresia no enkoraja ekipa USJTL nia misaun no rekomenda atu kompleta liután dadus hirak ne’ebé iha ona liuhusi peskiza detallu ba informasaun sira.

“Dadus ne’ebé USJTL iha, barak liu haree ba área jeolojia, maibé informasaun balun hanesan kultura, ekolojia (flora no fauna), istória, no seluk tan presiza esplora liután,” Governante ne’e dehan iha salaun Memorial Hall, Farol.

Nia agradese mós ba rezultadu identifikasaun ne’e, ne’ebé sei sai hanesan baze dadus ida ba dezenvolvimentu sítiu turíztiku iha futuru ba sustentabilidade turizmu komunitáriu iha Timor-Leste.

Vise-Ministra mós hato’o nia kompromisu katak bainhira prosesu governativa la’o estável ona iha futuru maka nia hakarak serbisu hamutuk ho ekipa USJTL.

“Nune’e bele kontinua filafali programa ne’ebé seidauk realiza iha munísipiu sira seluk hodi identifika sítiu turíztiku, atu nune’e bele kontribui di’ak liután ba prosesu dezenvolvimentu ekonomia, espesifikamente atu benefisia komunidade iha vida sosiál no ekonomia,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here