Funsionáriu EDTL hadi’a hela liña eletrisidade ne’ebé avaria.Imajen/Tatoli

DILI, 31 jullu 2020 (TATOLI)Prezidente Repúblika, Francisco Guterres ‘Lú Olo’, promulga Dekretu-Lei kona-ba transformasaun estatutu Eletricidade de Timor-Leste (EDTL) hosi diresaun jerál ba empreza públika (EDTL,EP) iha loron 20 jullu, maibé mudansa transformasaun ne’e sei akontese iha inísiu tinan oin.

Diretora Jerál EDTL, Arlinda Miranda, hateten mudansa ne’e sei iha faze preparasaun.

“Funsionamentu ba trasformasaun EDTL ba empreza públika sei funsiona loloos iha janeiru 2021, Tanba ne’e, daudaun ne’e Governu liuhosi Ministériu Obra Públika (MOP) sei forma komisaun instraladór ba kestaun ne’e molok EDTL trasforma-an ba empreza públika,” informa Dirijente ne’e ba Agência Tatoli, foin lalais ne’e iha ninia knaar fatin, Caicoli.

Notísia Relevante: Governu Deside EDTL Sai Empreza Públika

Tuir Arlinda Miranda, komisaun ne’ebé sei estabelese atu haree ba serbisu trasformsaun  diresaun jerál EDTL ba empreza públika.

“Iha tempu badak nia laran parese Gabinete MOP sei instala komisaun instaladora, nune’e atu  haree ba estrutura no serbisu empreza públika nian. Ami hein kuandu trasforma ona atu koloka ema halo nusa, serbisu ne’e oinsá, ida-ne’e komisaun maka hatene,” nia akresenta.

Komisaun instaladora, kompostu hosi Komisaun Funsaun Públika (KFP), Gabinete MOP no Diresaun Jerál Administrasaun no Finansa MOP, durante prosesu tranzisaun.

Enkuantu, daudaun ne’e funsionáriu EDTL hamutuk iha na’in-500.

Diretora Jerál ne’e esplika, bainhira EDTL trasforma ba EP, funsionáriu sira sei hili rasik atu  nafatin iha instituisaun públiku ka ba empreza públiku, tuir desizaun idaidak nian.

Nia konsidera, mudansa estatatutu EDTL tuir vizaun polítika VIII Governu atu hadi’a sistema servisu di’ak liután.

“Tuir polítika VIII Governu nian, EDTL tenke transforma ba EP maka foin bele di’ak atubele sustenta nia-an rasik ho nia osan ne’ebé maka iha. Bele hatama osan ba kofre Estadu maibé nafatin iha osan rezerva, nune’e bainhira ahi mate ka presiza buat ida karik bele hola rasik no la presiza osamentu kada tinan maibé nia rasik jere ona osan rasik hosi kliente sira,” nia subliña.

Biban ne’e, nia parte apoiu inisiativa Governu tanba iha rai barak liga ba fornesimentu enerjia eletrisidade ne’e empreza hotu, la’ós institusaun Governu nian.

“Ha’u pesoalmente haree esperiénsia rai seluk nian ha’u aseita, maibé ita haree fali ba ita-nia kondisaun agora. Ba ha’u fazeadamente, maibé desizaun ne’e ema polítiku maka bele foti tanba ne’e sira-nia kompeténsia la’ós ami-nian,” Diretora ne’e realsa.

Antes ne’e, Ministru Obra Públika, Salvador Eugênio Soares dos Reis Pires, esplika komisaun instaladora ne’e bé sei estabelese sei halo levantamentu dadus no mós sosializasaun ba funsionáriu sira no haree opsaun saida maka sira hakarak hili, tanba ne’e sei serbisu hamutuk ho KFP.

Governante ne’e dehan, komisaun instaladora ninia serbisu maka sei haree ba aspeitu hotu durante prosesu tranzisaun iha tinan ne’e hafoin implementa iha 2021.

Governu aprova ona estatutu EDTL sai hanesan empreza públika ho esperansa katak bainhira muda ona estatutu bele hamenus burokrasia no bele iha independénsia foti desizaun no halo atendimentu públiku ba avariasaun sira ho lalais no sustentável liútan.

Molok muda estatutu, EDTL hanesan diresaun jerál ida ne’ebé tutela ba MOP, nune’e atendimentu EDTL nian tuir burokrasia iha ministériu sira, tanba ne’e bainhira muda ona ba empreza públika maka instituisaun ne’e iha ona autonomia fiananseira hodi halo atendimentu ho efetivu liután.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here