Organisação Filiadas da FRETILIN (OFILIN) husu partidu foun ne’ebé oras ne’e hahú rekolla kartaun apoiante sira-nian iha baze maibé husu atrai apoia ho onestidade. Imajen/Evaristo Soares Martins.

DILI, 31 jullu 2020 (TATOLI)—Organisação Filiadas da FRETILIN (OFILIN) husu partidu foun ne’ebé oras ne’e hahú rekolla kartaun apoiante sira-nian iha baze maibé husu atrai apoia ho onestidade no sivizmu, nune’e la’o tuir dalan ezersísiu demokrátiku.

Prezidente OFILIN, José Manuel Fernandes “Nakfilak”, hato’o sira-nia pozisaun politika katak demokrasia lori biban atu ezerse ema idak-idak no ema hotu  nia direitu atu halo opsaun polítika iha povu nia moris nu’udar emar no sidadaun polítiku.

“ Maibé, iha ezersísiu Demokrátiku ne’e tenke hatuur tuir dalan no regra ne’ebé kontempla iha Konstituisaun no Leis. Bem-Vindo ba partidu foun sira, bainhira hala’o konsolidasaun iha baze hodi buka apoiu no  simpatia ruma atu lori ba halo rejistu karik, tenke hala’o ho onestidade no sivizmu labele hahú ho manobra. Bainhira ita hakarak hadi’a buat ruma ne’ebé naksalak, tenke ho korajen hatete buat ne’ebé loos, buat ne’ebé edukativu ba ita-nia adeptu sira,” dehan Prezidente OFILIN, José Manuel Fernandes “Nakilak”, ba jornalista liuhosi Konferénsia Imprensa, iha sede OFILIN, Luz Clarita, Dili, sesta ne’e.

Eis Deputadu ne’e fó hanoin, atu hakarak hetan apoia no kartaun ba rejistu lalika lori ema seluk nia naran, hahalok ne’e sei hamihis valór organizasaun nian, hamihis mós adeptou sira-nia fiar mai ita bainhira lia-loos ne’e mosu mai iha leten.

Nune’e mós, nia dehan, tenke respeita malu tuir idak-idak nia vontade, keta kari rai-rahun ba malu, tan ita hotu nia objetivu hakarak hadi’a no halo loos ba lalaok hirak ne’ebé ladún loos ne’ebé la’o buras iha ita rain, tanba diferensa ideia ne’e nu’udar esénsia demokrasia ninian rasik.

Atu responde ba preokupasaun iha baze no xamada telefónika, whatsapp no mensajen ne’ebé la para de’it, hodi husu nia konfirmasaun no klareza ba situasaun hirak ne’e hotu, ohin OFILIN  ne’ebé komposta hosi OPJLATIL, OJETIL, FITUN no AS’WAIN LEMORAI no FUAN DOMIN ho nia estrutura tomak mai, liuhosi konferénsia imprensa hodi hola pozisaun politika hanesan tuir mai nee:

  1. Kuadru Sentrál OFILIN respeita no valoriza tebes direitu polítika ema hotu nian komforme artigu 46 Konstituisaun Repúblika maibé nu’udar organizasaun masa no filiada FRETILIN, OFILIN deklara pozisaun lori naran Kuadru Sentrál, kuadru munísipiu, postu, suku, aldeias no simpatizante sira ba públiku hotu katak “Ami Para Sempre”.
  2. OFILIN apela ba kuadru OFILIN tomak hosi nasionál to’o baze katak ita-nia vontade atu defende FRETILIN ho bia interese tomak ne’e inabalavel, katak la nakdoko, la mate, indiskutível.
  3. Ba OFILIN tomak labele moris tuir hoax, fake news no moris tuir rumores, maibé moris tuir valór no prinsípiu ne’ebé orienta organizasaun.
  4. Husu ba Lider sira hosi jerasaun tuan atu hatudu ezemplu di’ak ba sosiedade joven ida-ne’e, atu buka forma ba solusaun ba diferensa polítika ne’ebé mosu iha rai ida-ne’e, husik eransa ne’ebé nakonu ho amizade, fraternidade no respeita mutua atu nune’e jerasaun ne’ebé hatutan mehi ne’e, bele  la’o tuir valór no prinsípiu ne’ebé Povu Maubere kuda durante ninia konvivénsia tomak nu’udar Emar, nu’udar Estadu no nu’udar Nasaun.
  1. Labele sai fali atan ba orgullu pesoál tanba Timor-Leste ne’e hamriik ho kosar no raan ema barak nian, buat di’ak ne’ebé sira idak-idak fó, mak sira-nia vida ka moris rasik nu’udar moeda troka ba Libertasaun no Independénsia ida-nee. Tan ne’e ita tenki tane aas valór ida-ne’e.
  1. Buka korridór própriu atu hato’o ba malu, asuntu relasionadu ho vida Eestadu nian, la’ós uza mídia sosiál hodi halo koresaun ba ida no seluk nia hahalok, ne’ebé bele hetan interpretasaun hosi terseiru nu’udar fali atake ba malu, hahalok ne’ebé bele lori prejuizu boot ba konvivénsia entre líder sira duni, nune’e hahalok ida-ne’e rasik sei afeta ba ema-nian, tuir grupu ka partidu ne’ebé sira milita ba.
  1. Respeita ba diferensa étnika, krensa (fiar), polítika, rasa no kór tuir Konstituisaun RDTL haruka, atu nune’e ita bele hametin liu unidade entre ita, hodi fó vida ba unidade nasionál ne’ebé sai nu’udar aliserse ba diversidade hirak ne’ebé iha nasaun Timor-Leste.
  2. Diálogu nu’udar dalan ba solusaun diferensa tomak, ami prontu atu servisu hamutuk hodi hakbesik Maun Boot sira hodi hakotu dirverjénsia hirak ne’e; Timor-Leste labele hein tan, hametin Estadu hahú agora, atu nune’e dalan ba tranzisaun jerasionál bele la’o ho sustentável, seguru, saudável no trankilu.
  1. OFILIN respeita demokrasia povu nian, maibé husu ba ita tomak atu hateke ba situasaun ne’e ho hakmatek no respeita nafatin ba Konstituisaun Repúblika no Regra Demokrátika hotu. Hasees-aan hosi movimentu hotu ne’ebé polítikuks forma seluk ne’ebé hanoin atu koko hafraku Estabilidade Nasionál, nune’e ita hamutuk respeita no valoriza nafatin órgaun estadu hirak ne’e tuir  konfiansa ne’ebé ita espresa tuir vontade polítika ne’ebé ita ezerse iha urna, atu nune’e hatudu nafatin ita-nia respeita ba Xefe Estadu no Xefe Governu to’o hakotu mandatu.

Jornalista : Evaristo Soares Martins

Editór        :  Cancio Ximenes

1 KOMENTÁRIU

  1. Nu’dar militante Fretilin desde 1975, no nu’dar Vice Koordenador Asosiasaun Profesional Edukasaun Militante Fretilin (APEMF) sente orgullu ho apelo hosi lideransa OFILIN no apelu tutan ba kamarada sira hosi Profesional Edukasaun hanesan funcionario iha instituisaun edukasaun, doçente no profesor sira hotu, militante Fretilin nian, wainhira anin boot akontese hela labele hakfodak atu halai arbiru, bele monu ba raikuak, bele aimonu tan bele xoke buat ruma. Tenta atu hamriik metin atu hametin an, anin boot ne’ebe lori rairahun barak no foer ne’e sei liu leet deit. Kontinua eduka ita nia joven, aluna alunu sira ho valor nazionalismo no patriotismo ne’ebe Fretilin jerasaun 75 husik hela mai ita, buka atu kombatę hahalok irasional ne’be hamaten hanoin kritiku, demokratku, no siensia, labele halo juramentu arbitru, labele jura unidade partido politika ida, selae, sei arrepende ikus mai, wainhira hanoin muda. Unidade nasional mak importante liu. Nu’dar educador, ita nia papel maka luta ba lebertasaun povu hosi ignoransia, liliu husi hahalok ne’be halo beik povu no bosak povu. Parabens ba Lideransa OFILIN, Camarada Jose Manuel Fernandes. Viva APEMF, Viva OFILIN, Viva Fretilin Viva RDTL!

HAKEREK NO HATÁN

Please enter your comment!
Please enter your name here