Vizita Governu Timor-Leste no ekipa Embaixada Xina, ba konstrusaun armajen Baucau, sesta (31/07). Imajen/Natalino Costa

BAUCAU, 31 jullu 2020 (TATOLI)-Governu Timor-Leste (TL) reprezenta hosi Ministru Koordenadór Asuntu Ekonómiku, Joaquim Amaral, hamutuk ho Ministru Turizmu Komérsiu Indústria, José Lucas do Carmo da Silva, inklui membru Komisaun D ne’ebé trata asuntu Ekonomia no Dezenvolvimentu no Embaixadór Xina iha Timor-Leste, Xiao Jianguo, halo inspesaun iha armajen foos iha Baucau no Natarbora, Munisípiu Manatuto.

Ministru Koordenadór Asuntu Ekonómiku, Joaquim Amaral, hateten vizita ne’e atu haree besik liu progresu konstrusaun armajen.

“Ita mai halo vizita inspesaun mai konstrusaun armajen ne’ebé hetan doasaun hosi Governu Xina, vizita ne’e importante tebes atu hatene ita-nia preparativu liga ho ita-nia programa rekuperasaun ekonómiku hafoin enfrenta situasaun COVID-19,” tenik Ministru Joaquim durante vizita ba konstrusaun armajen Baucau, sesta ne’e.

Governante ne’e esplika, konstrusaun ba armajen rua ne’e maihusi doasaun fundu hosi Governu Xina liuhosi kooperasaun V Governu Konstitusionál hosi eis Primeiru-Ministru, Kay Rala Xanana Gusmão.

“Konstrusaun ba armajen rua ne’e ho valór totál millaun $25 hosi Governu Xina rasik no ajuda ne’e hanesan grant la’ós tusaun,” nia akresenta.

Iha ámbitu ne’e, Ministru apresia no hato’o agradesimentu ba tulun Governu Xina ne’ebé ajuda tebes ba nesesidade.

“Lori Governu nia naran ho ekipa ministériu sira, inklui Parlamentu Nasionál, agradese ba Governu no Povu Xina nian jenerosisade ba ajuda tomak ne’ebé fó ba ita, la’ós de’it ba armajen maibé iha tempu COVID-19 ne’ebé difísil, sira hambrik iha ita-nia sorin lori ai-moruk no ajuda seluk ne’ebé ita presiza tebes,” nia subliña.

Armajen Baucau hamriik iha rai ektare haat maibé daudaun konstrusaun foin halo iha rai ektare rua.

“Konstrusaun ne’e atinje ona porsentu 65 tuir planu, espera bele hotu iha dezembru tinan ida ne’e. Fiar katak bele hotu tuir tempu nune’e ita-nia planu ne’ebé maka atu uza armajen sai hanesan fatin halibur sasán hodi suporta ita-nia komunidade sira iha foho ne’ebé iha faze rekooperasaun ekonómika bele fasilita liután ita iha Sentru Lojíztiku Nasionál no bele halibur sasán sira iha rejiaun sira,” nia realsa.

Armajen  Baucau iha uma haat, ne’ebé uma rua hanesan fatin tau hare kulit no fatin rua seluk fatin prosesamentu hare ba foos hodi distribui ba merkadu, hanesan mós armajen iha Natarbora.

Tuir Joaquim Amaral, armajen ne’e sei kompleta nia fasilidade hotu tanba armajen iha fatin rua ne’e la’ós atu tau de’it foos maibé iha fasilidade prosesamentu hotu no armajen iha munisípiu rua ne’e bele akumula tonelada 10.000 ba produtu foos hare no produtu sira seluk.

Armajen iha Munisípiu Baucau no Natarbora ne’e  konstroe hosi kompañia Sanghai Constration  no konstrusaun ne’e rasik halo ho durasaun fulan-30 de’it.

Fulan-12 nia-laran halo konstusaun fízika no fulan tuirmai halo instalasaun ba ekipamentu sira inklui treinu ofisiál ne’ebé atu jere ekipamentu sira ba armajen.

“Amajen ne’e tuir loloos hotu iha fulan-tolu foin daudaun ne’e, maibé tanba situasaun COVID-19, entaun atraza prosesu hotu. Maibé ohin konfirma hosi parte Governu Xina katak konstrusaun ne’e sei hotu iha dezembru tinan ne’e,” nia realsa.

Ministru Turizmu, Komérsiu no Indústria, José Lucas do Carmo da Silva, hateten nia parte sei kolabora hamutuk ho ministériu relevante atu bele tau-matan didi’ak no bele funsiona didi’ak armajen hirak ne’e.

“Nu’udar membru Governu ba asuntu Komérsiu no Indústria, ami sei haree posibilidade saida maka ita bele halo hodi bele kria indústria no komersializasaun ne’ebé di’ak,” nia subliña.

Iha fatin hanesan, Embaiaxadór Xina ba Timor-Leste, Xiao Jiangou, hateten relasaun bilaterál entre Timor-Leste no Governu Xina to’o agora sei kontinua la’o ho di’ak no iha fraternidade nia laran, tanba ne’e Governu Xina sempre ajuda Timor-Leste iha kualkér momentu ne’ebé maka presiza.

“Konstrusaun armajen Baucau no Natarbora ne’e nu’udar doasaun hosi Governu Xina, tanba ne’e ami hakarak haree Timor-Leste iha armajen ba prosesamentu no rai foos, nune’e aban bain-rua bele rezolve povu-nia nesesidade,” nia subliña.

Nia dehan, kooperasaun ne’e sei la to’o iha ne’e de’it maibé sei kontinua nafatin ba futuru.

“Ami sei kontinua apoia Timor-Leste iha kualkér tempu bainhira Governu presiza ami nian apoiu. Tanba Governu Xina liuhosi koopersaun durante ne’e suporta fasilidade hotu hamutuk kontra COVID-19,” nia akresenta.

Nune’e mós, Prezidente Komisaun D, Antoninho Bianco, agradese ba Governu Xina nia apoiu ba armajen rua ne’e tanba bele mobiliza fundu rasik ho montante millaun $25 ba konstrusaun ne’e.

“Hanesan povu nia reprezentante, haree katak bainhira ema fó sasán hanesan ne’e ita mós tenke prepara-an la’ós tau-matan de’it maibé oinsá bele funsiona ba oin, tanba ne’e presiza asegura fasilidade mákina sira ne’ebé atu prosesa foos tanba ne’e hanesan indústria ona,” nia akresenta.

Nu’udar reprezentante povu, Antoninho husu ba Governu atu asegura komersializasaun tanba armajen rua ne’e iha kapasidade.

“Husu ba Ministériu Turizmu, Komérsiu no Indústria (MTKI) atu haree ba kestaun ne’e tanba aban bain-rua armajen ne’e sai fatin indústria no komersializaun prodúz no fa’an ba merkadu,” nia subliña.

Nia husu mós ba Ministériu Agrikultura no Peska (MAP) atu tau-matan ba produsaun, tanba se lae maka armajen ne’e bele mamuk.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here