iklan

BAUCAU, HEADLINE, MUNISÍPIU

Uma-kain 164 Suku Ostico seidauk asesu eletrisidade

Uma-kain 164 Suku Ostico seidauk asesu eletrisidade

Xefe Suku Ostico, Postu Administrativu Vemasse, Munisípiu Baukau, Policarpo Da Silva. Imajen Tatoli/Florêncio Miranda Ximenes

BAUCAU, 30 jullu 2020 (TATOLI)– Xefe Ostico, Postu Administrativu Vemasse, Munisípiu Baucau, Policarpo Da Silva, informa uma-kain hamutuk 164 iha Aldeia Ostico Sorin no Bahamori iha Suku Ostico seidauk asesu ba instalasaun liña eletrisidade.

“Ha’u-nia Suku Ostico hamutuk aldeia tolu hanesan Haunau, Ostico Sorin no Bahamori hamutuk uma-kain 412, maibé uma-kain aldeia rua hanesan Ostico Sorin no Bahamori ho totál uma-kain 164 mak seidauk asesu eletrisidade tanba seidauk instala ba sira-nia uma,” tenik Xefe Suku Policarpo iha Suku Ostico, Baucau, kinta ne’e.

Autoridade Lokál ne’e dehan, Governu liuhosi Ministériu Obra Públiku (MOP), Eletricidade de Timor-Leste (EDTL) halo ona konstrusaun maibé seidauk to’o iha aldeia rua ne’e.

Nia haktuir, daudaun ne’e komunidade sira iha suku refere bele asesu ona estrada no bee-moos, maibé komunidade balun mak seidauk asesu.

“Ami agradese Governu tanba kuaze komunidade iha área ne’e asesu hotu ona estrada no bee-moos, hela komunidade oituan mak seidauk asesu ba eletrisidade, maibé ne’e hanesan pasu pozitivu iha ukun rasik-an ne’e,” nia akresenta.

Tuir nia, suku ne’e área potesiál tebes ba hare, nuu no kamí inklui produtu seluk tan, tanba ne’e ho estrada di’ak bele fasilita ona atu lori ba merkadoria inklui bee-moos ne’ebé bele garante ona nesesidade loroloron nian.

Antes ne’e, Governu liuhosi MOP indetifika ona daudaun ne’e iha suku 77 iha territóriu tomak mak seidauk asesu ba eletrisidadde durante tinan barak nia-laran, tanba ne’e MOP tau ona planu prioridade 2021 implementa pakote balun tuir faze dahuluk.

MOP mós halo ona dezeñu ba eletrisidade hamutuk pakote 33 atu implementa iha munisípiu hotu ho nia prioridade bazeia ba suku ne’ebé hetan ona maibé seidauk kompletu no ba ne’ebé besik liu liña infraestutura ka distribuisaun ne’ebé ezistente ona.

Jornalista: Florêncio Miranda Ximenes

Editora: Julia Chatarina

iklan
iklan

Leave a Reply

iklan
error: Content is protected !!