Atividade ekipa tékniku EDTL iha terrenu. Imajen Tatoli/António Gonçalves

DILI, 30 jullu 2020 (TATOLI)-Prezidente Asosiasaun Defeza Konsumidór Timor-Leste, Tane Konsumidór, António Ramos da Silva ‘Naikoli’, apresia no louva Governu nia esforsu transforma servisu Eletricidade de Timor-Leste (EDTL) ne’ebé antes ne’e hanesan diresaun jerál iha Ministrériu Obra Públika (MOP) ba empreza públika, nune’e bele fornese enerjia eletrisidade ba públiku ho di’ak.

“Tane felisita Governu ho inisiativa ida ne´e, tanba biban barak maka Tane reklama kona-ba ida ne´e no rekoñese katak tuir loloos eletrisidade hanesan servisu públiku ne’ebé iha interese jerál ba konsumidór  timor-oan,” tenik Prezidente Tane liuhosi konferénsia imprensa ne’ebé hala’o iha edifísiu Tane Konsumidór, Vila-Verde, kinta ne’e.

Notísia Relevante: Governu Deside EDTL Sai Empreza Públika

Kriasaun Komisaun Instaladora ba Transformasaun EDTL Sai EP Hein Dekretu-Lei Vigora

Iha loron 20 jullu, Prezidente Repúblika, Francisco Guterres ‘Lú Olo’, promulga Dekretu-Lei kona-ba transformasaun estatutu EDTL ba empreza públika.

Xefe Estadu konsidera, setór eletrisidade nu’udár pilár prinsipál ida ba dezenvolvimentu ekonomia iha país no instrumentu previlijiadu ba promosaun seguransa no moris di’ak ba povu, tanba ne’e Estadu konsidera nu’udar servisu públiku esensiál.

Ba António Ramos, eletrisidade nu’udar sasán esensiál ba konsumidór sira, seguransa, saúde no ba partisipasaun ema sira nia iha sosiedade nian, ne’ebé presiza tau a’as iha rai ne’ebé demokrátiku no dezenvolvidu.

Nia konsidera ho alterasaun estatutu ne’e, bele presta servisu iha eletrisidade ho kualidade ba konsumidór sira.

“Ho alterasaun estatutu EDTL ba empreza públika hola parte mós iha buat ne’ebé maka Asosiasaun Tane Konsumidór ninia reivindikasaun, iha loron 15 marsu 2020, ne’ebé husu atu presta servisu eletrisidade ho kualidade ba konsumidór sira hotu,” António Ramos realsa.

Nia nota, diploma ne’ebé maka promulga ona hosi Xefe Estadu hanesan hakat ida ba oin hodi garante servisu di’ak ba konsumidór sira hotu.

Tane reivendika asesu eletrisidade ba timor-oan tomak

Biban ne’e, Prezidente Tane Konsumidór afirma katak Tane  lori lian konsumidór sira nian, reivendika asesu eletrisidade ba timor-oan tomak, la iha diskriminasaun ba ema ka territóriu (prinsípiu ba universalidade).

Antes ne’e, Governu liuhosi MOP iha tinan 2021 ba oin hakarak prioritiza suku hamutuk 77 iha Timór laran ne’ebé seidauk asesu ba eletrisidade, liuliu suku ne’ebé besik liña elétrika ezistente.

Asosiasaun Defeza Konsumidór nafatin husu entidade reguladora atu respeitu ba direitu konsumidór sira nian ne’ebé konsagra ona iha lei.

“Liuhosi definisaun ba kuadru legál ne’ebé obriga EDTL hato’o informasaun ba konsumidór (direitu ba informasaun) sira kona-ba kondisaun servisu, selebra kontratu hosi fornesedór servisu ba enerjia elétrika no konsumidór, implementa medida esensiál sira hodi hadi’ak kualidade servisu báziku ne’e ho forma regulár no hatuur ninia folin ne’ebé justu,” Prezidente Tane Konsumidór subliña.

Nia dehan EDTL tenke tenke hatudu prestasaun servisu ho forma kontinua la iha interrupsaun (prinsípiu kontinuidade), servisu ho kritériu mínimu ba kualidade no folin ne’ebé maka justu no asesível ba timor-oan tomak (Prinsípiu ba kualidade).

Nune’e mós, teknke disemina informasaun kona-ba lala’ok eletrifikasaun ne’ebé maka loos ba konsumidór sira, kona-ba kondisaun, folin no kontratu (protesaun ba konsumidór).

Nia husu Governu presiza kria kondisaun ba seguransa no distribuisaun ba eletrisidade, salvaguarda integridade fízika ba konsumidór sira nian, durasaun ba ekipamanetu sira no ninia funsionamentu ba ninia infraestrutrua sira (prinsípiu ba seguransa).

Asosiasasaun TANE  Konsumidór kontinua ho papél ne’ebé vijilante no interventivu iha matéria atu nafatin defende direitu konsumidór.

Entretantu, ho mudansa estatutu EDTL maka sei apoiu Governu ba definisaun polítika rekursu enerjétiku, atu halo planu eletrifikasaun nasionál, promove uza efisiente enerjia eléktrika, asegura fornesimentu enerjia elétrika ba konsumu,  kualidade fornesiementu, hadi’ak sistema integradu automatizasaun no komunikasaun, medida ba kontrolu no inspesaun ba eliminasaun konesaun ilegál, ezerse atividade importasaun no esportasaun enerjia elétrika.

Eletricidade de Timor-Leste, Empreza Públika (EDTL,EP) nu’udar pesoa koletiva públika, integradu iha administrasaun indireta Estadu ho personalidade jurídika no kapasidade judisiáriu, autonomia administrativa, autonomia finanseira no partrimóniu própriu.

Membru Governu  ne’ebé responsável ba enerjia elétrika sei ezerse nia podér atu tutela no superviziona EDTL,E.P liuhosi Konsellu Administrasaun,  Komisaun Ezekutiva no  Konsellu Fiskál.

Jornalista : Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here