Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 30 jullu 2020 (TATOLI)-Iha tersa (29/07), Ministru Obra Públika, Salvador Eugênio Soares dos Reis Pires, kumpre notifikasaun Ministériu Públiku (MP) nian hodi marka prezensa iha edifísiu Prokuradór Jerál Repúblika (PGR, sigla portugés) iha Dili, hodi presta deklarasaun ka submete ba investigasaun durante oras haat nia-laran ba indísiu kazu balun ne’ebé sei iha segredu justisa.

Salvador klarifika, ninia prezensa iha MP atu presta deklarasaun ne’ebé la’ós relasiona ho ninia mandatu nu’udar membru Governu maibé hanesan kazu tuan ne’ebé momentu ne’ebá nia seidauk sai ministru.

“Loloos ha’u labele koa’ia maibé ita bo’ot (jornalista) sira husu ha’u, entaun ha’u atu dehan hanesan fó sai ona iha mídia antes ne’e relasiona ho edifisiu ba Komisaun Funsaun Públiku ne’e iha kazu ida, ne’e la liga ho ha’u nia mandatu nu’udar ministru maibé hanesan kazu tuan ida ne’ebé momentu ne’ebá ha’u hanesan konsultór ba edefisiu KFP ne’ebé lori prosesu ne’e ba Tribunál hodi kontra Governu,” hateten Ministru Salvador hafoin ramata enkontru ho Primeiru-Ministru, Taur Matan Ruak, iha Palásiu Governu, kinta ne’e.

Notísia Relevante: Ministru Salvador Pires Presta Deklarasaun iha MP Durante Oras Haat ho Balun

Hafoin enkontru ho Xefe Governu, governante ne’e dehan razaun nia rejeita fó komentáriu hafoin presta deklarasaun, tanba konsidera hanesan segredu justisa no sei iha prosesu nia-laran.

“Hanesan sidadaun ida di’ak hakarak koopera ho justisa hodi ha’u ba iha ne’ebá kontribui ba prosesu justisa, iha justisa rasik iha segredu justisa. Nu’udar sidadaun ida iha lei nia okos hakarak kontribui ba justisa tanba ne’e maka ha’u hili hodi la ko’alia ho mídia,” nia subliña.

Iha edifísiu PGR hafoin ramata presta deklarasaun, governante ne’e sai hosi odamatan kotuk PGR hodi ses-an hosi mídia sira (televizaun, mídia online, no jornál) ne’ebé hein ona iha li’ur.

Ministru ne’e afirma, atu hatene klaru liután relasiona ho prosesu ne’e, hein prosesu justisa tuir mai bainhira iha ona Tribunál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here