Parlamentu Nasional. Imajen Tatoli/Egas Cristovão

DILI, 30 jullu 2020 (TATOLI)—Parlamentu Nasionál (PN) kontinua adia eleisaun ba membru Conselho de Imprensa (CI) tanba presiza estabelese metodolojia eleisaun hosi líder bankada parlamentár sira.

Notísia Relevante: Mekanizmu eleisaun ba membru CI sei pronunsia liuhosi plenária

Xefe Bankada Frente Revolucionária de Timor-Leste Independente (FRETILIN), Deputadu Francisco Miranda Branco, husu adia ajenda eleisaun ne’e tanba seidauk iha metodolojia hodi define prosesu eleisaun.

“Prosesu eleisaun ne’e atu la’o di’ak, ami propoin enkontru líder bankada define kedas metodolojia para fasilita ita-nia prosesu eleisaun ne’e. Ami haree kompleksu uitoan tanba kandidatu na’in-haat, tolu jornalista no ida jurista, ne’e para fasilita ita-nia prosesu eleisaun. Ne’ebé, ita define lai metodolojia,” Xefe Bankada FRETILIN ne’e propoin liuhosi plenária, Parlamentu Nasionál, kinta ne’e.

Entretantu, Deputada Bankada CNRT, Maria Terezinha Viegas, konkorda ideia Xefe Bankada FRETILIN nian tanba iha reuniaun líder bankada iha semana rua liu ba bankada CNRT propoin proporsionalidade ba eleisaun membru Conselho de Imprensa (CI). 

“Tanba ne’e mak ami submete husu fila-fali ba desizaun plenária nian”, dehan Deputada Bankada CNRT ne’e.

Iha parte seluk, Vise-Xefe Bankada PLP, Deputadu Francisco Vasconcelos, hateten asuntu sira-ne’ebé la importante husik lai no deskuti lai Lei Kódigu Mineiru.

“Ajenda ba membru Conselho de Imprensa iha semana kotuk ita ko’alia duni maibé ha’u konkorda ho bankada FRETILIN tanba iha lei dehan jornalista ida no jurista ida. Regra eleisaun mós iha líder bankada ita seidauk akresenta loloos kona-ba mekanizmu eleisaun ne’e. Tanba ne’e, di’ak liu define tiha lai regra, mekanizmu depois mak lori mai iha plenária. Ne’ebé, depois resesu mak ita halo eleisaun, laiha urjénsia liu,” dehan Vise-Xefe Bankada PLP ne’e.

Deputadu Bankada FRETILIN, Joaquim dos Santos, sekunda opiniaun sira kona-ba atu suspende lai eleisaun ba membru Conselho de Imprensa (CI) ne’e.

“Ita tenke haree lai mekanizmu atu halo eleisaun tanba ita kahur ba buat rua, ida péritu komunikasaun sosiál oin seluk no ida jurídiku ho nia kapasidade oin seluk. Ha’u hanoin di’ak liu ita suspende eleisaun no husik lai líder bankada estabelese lai regra regra oinsá mak hili katak halo pakote ka lae, nune’e lori mai plenária no ita tama ba votasaun ne’e fásil,” dehan Prezidente Komisaun A ne’e.

Xefe Bankada KHUNTO, Deputada Olinda Guterres konsidera ajenda eleisaun ba Conselho de Imprensa la importante tanba ne’e di’ak liu adia.

“Ha’u hanoin suspende tiha de’it tanba ajenda ne’e ladún penting,” Deputada Bankada KHUNTO ne’e hateten.

Ho sujestaun hirak ne’e, Prezidente Parlamentu Nasionál Ein-Ezersísiu atuál Vise-Prezidente Parlamentu Nasionál, Deputada Maria Angelina Sarmento Lopes, deside adia ajenda eleisaun ne’e.

“Ha’u hanoin ejizénsia hosi Lei Komunikasaun Sosiál fó hanoin mai ita define uluk lai prosedimentu ka metodolojia katak kandidatu individuál ka kandidatu mai ho pakote, liuliu kona-ba kompozisaun Konsellu Imprensa. Ha’u hanoin meza konkorda opiniaun hosi bankada FRETILIN, PLP no Bankada KHUNTO katak atu define uluk lai metodolojia eleisaun ba kandidatu sira. Ho permisaun plenária nian ajenda ida Konsellu Imprensa nian ita husik pendente lai,” Deputada Maria Angelina Sarmento Lopes deside adia ajenda ne’e.

 Jornalista : Evaristo Soares Martins

 Editór       :  Cancio Ximenes

HAKEREK NO HATÁN

Please enter your comment!
Please enter your name here