DILI, 30 jullu 2020 (TATOLI)- Membru FALINTIL-Forsa Defeza Timor-Leste (F-FDTL) hamutuk na’in-71, ohin, termina terseiru kursu postu Kabu iha Komponente Formasaun no Treinu Metinaro.
Membru hirak ne’e tuir kursu iha sentru formasaun Metinaro kada loron ida oras ualu ho nia durasaun tempu semana hitu.
Materia ne’ebé Instrutór sira hanorin foku ba area rua hanesan jerál ho tékniku no táktika, hanesan ezekuta tékniku no prosedimentu hodi dezempeña funsaun hanesan segundu komandante eskuadra, monitor no instrusaun sira, identifikasaun regulamentu disiplinár militár, kombate, edukasaun moral no etika, lideransa, misaun militár nian no seluk tan.
Formasaun ne’e importante tebes ba formadu sira no instituisaun atu transforma koñesimentu ba militár hodi dezempeña funsaun hosi soldadu atu promove ba postu Kabu.
Iha enserramentu terseiru kursu Kabu ba tinan ne’e ne’ebé ensera direita hosi Komandante Formasaun no Treinu, Koronél Cesário Marçal Ximenes ‘Haksolok’ hateten, formasaun ne’e oinsá prepara membru hirak ne’e atu asume segundu komandante eskuadra no preparasaun promosaun hosi soldadu ba devisa postu kabu.
Nia tenik, desizaun ne’e sei mai hosi Jenerál hasai ba konsellu promosaun diskute no promove hafoin halo promosaun.
“Depende planeamentu maibé normálmente depois kursu promove kedas, maibé bazeia ba orsamentu ne’ebé daudaun uza duodesimu entaun depende planu,” hateten Koronél Cesário Marçal Ximenes ‘Haksolok’.
Nia apela nafatin ba membru hirak ne’e atu aprende nafatin hodi opta matéria sira ne’ebé durante hetan iha formasaun no atu implementa ba servisu.
Membru F-FDTL na’in-71 ne’ebé tuir terseiru kursu kabu ne’e kompostu hosi komponente Terrestre na’in-tolu, Komponente Naval na’in-20, Komponente Apoiu Servisu na’in-40, Polísia Militár na’in- tolu no Kuartél Jerál na’in-lima.
Jornalista : Nelson de Sousa
Editór : Francisco Simões
