Iha ámbitu seremónia pose Vogál RTTL,EP foun, João da Silva (daruak hosi loos), iha Salaun Prezidénsia Konsellu Ministru, Palásiu Governu, kinta (30/07). Imajen/Antónia Gusmão

DILI, 30 jullu 2020 (TATOLI)-Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, iha kinta ne’e fó posse ba vogál Rádiu Televizaun Timor-Leste, Empreza Públika (RTTL,EP).

Vogál ne’ebé simu pose maka, João da Silva Sarmento, ba mandatu tinan-haat hodi subtitui vogál sesante, Joazito Viana.

Iha ámbitu seremónia pose, Ministru Francisco husu ba emposadu atu serbisu di’ak ho vogál sira seluk ne’ebé iha ona hodi tau matan ba RTTL hodi fornese informasaun di’ak liu no kredível ba públiku.

Nu’udar mídia estatál, governante ne’e husu atu serbisu ho responsabilidade, hamutuk ho direjente sira seluk.

“Subtituisaun ne’e la’ós buat foun ba ita, bainhira de’it bele subtitui importante tenke tuir regra ne’ebé mak vigora. Ha’u fó parabéns ba emposadu tanba disponível hodi mai asume funsaun ida ne’e no hein katak ho vogál hotu bele servisu hamutuk hodi nune’e bele lidera mídia ne’e sai mídia estatál ida ne’ebé di’ak liu,” hateten Ministru Francisco, iha Salaun Prezidénsia Konsellu Ministru, Palásiu Governu.

Nia dehan, Governu sei hamutuk ho direjente sira hodi dezenvolve RTTL sai Mídia Estadu ne’ebé mak fó informasaun ho kualidade, edukativu, rigór, ho jornalista sira ne’ebé maka imparsiál.

Emposadu, João da Silva Sarmento, sente onra boot ida ba nia tanba bele inklui iha vogál RTTL.

“Ami vogál sira hanesan atu fó apoiu, tanba ne’e ba ha’u hanesan onra boot ida no ha’u bele dehan hanesan oportunidade ida hodi asume ho responsabilidade hodi serbisu hamutuk ho vogál sira seluk atu nune’e bele apoia Prezidente RTTL hodi dezenvolve mídia ne’e hanesan televizaun Estadu nian hodi fornese informasaun no fó roman ne’ebé di’ak ba povu Timor-Leste inklui sai mós hanesan mata-dalan ba dezenvolvimentu iha nasaun ne’e,” João promete.

Prezidente RTTL, EP, Francisco Gari, hateten pose ba vogál João da Silva Sarmento hodi kompleta vogál sira.

“Espera katak ninia prezensa bele apoia ideia di’ak liu oinsá mak atu dezenvolve RTTL ne’e ba oin hodi serví Estadu no povu,” dehan Prezidente mídia Estatál ne’e.

Iha seremónia posse ne’e partisipa mós hosi Sekretáriu Estadu Komunikasaun Sosiál, Merício Juvinal dos Reis ‘Akara’, Diretór no Prezidente RTTL, Prezidente Agência Tatoli, José da Costa, inklui funsionáriu MAPKOMS no SEKOMS.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here