Ministru Asuntu Parlamentár no Komunikasaun Sosiál, Francisco Jerónimo, ho ekipa hasai fotografia hamutuk ekipa redasaun Lafaek News, hafoin hala’o vizita iha edifísiu Balide, kinta (30/07). Imajen/MAPKOMS

DILI, 30 jullu 2020 (TATOLI)-Ministru Asuntu Parlamentár no Komunikasaun Sosiál, Francisco Jerónimo, apresia progresu serbisu Lafaek News tanba maski mídia online ne’e foin eziste maibé hatudu ona rezultadu di’ak.

“Ha’u ba vizita Lafaek News, tanba mídia online ne’e foin harii fulan-ualu, maibé realidade ha’u haree katak sira iha ona progresu di’ak tanba sira-nia leitór pájina to’o ohin loron hamutuk 5.000,” tenik Ministru Francisco ba Agência Tatoli, kinta ne’e hafoin halo vizita ba Lafaek News, iha Balide.

Mídia online ne’e kada loron bele hetan leitór to’o 1.000.

“Entaun ida-ne’e bele dehanbLafaek mós komesa hahú dezenvolve-an, ha’u hein katak  iha tinan oin mai bele aumenta tan kapasidade,” nia akresenta.

Tuir governante ne’e, ezisténsia mídia online sira iha tempu agora bele ajuda komunidade sira atu akompaña notísia iha kualkér oras no iha fatin ne’ebé de’it ho ligasaun internet.

Tanba ne’e, nu’udar membru Governu ne’ebé tutela ba asuntu Parlamentár no Komunikasaun Sosiál promete sei apoia mídia sira hotu tanba sira halo funsaun ba divulgasaun informasaun.

“Iha termu kooperasaun ami halo ho parte hotu, ami la hili ida maka sai anak emas ka anak perak, hotuhotu konsidera hanesan, halo divulgasaun hanesan, hodi hato’o informasaun ba ita-nia povu,” Ministru subliña.

Iha fatin hanesan, Diretór Lafaek News, Floriano Soares, apresia ho prezensa membru Governu ida hodi bele haree direta kondisaun mídia sira, espesiál liu ba Lafaek News nian.

“Ami kontente ho Ministru ida bele hakat mai to’o ami-nia fatin hodi haree besik kondisaun servisu mídia ne’e, ne’e ba dahuluk, tanba ne’e ami kontente,” nia akresenta.

Nia dehan, maski ezisténsia mídia online ne’e hasoru dezafíu maibé la dezesperadu no sei kontinua eziste nafatin tanba ho rekursu naton ne’ebé iha, sempre prontu no hakarak kontribui informasaun ba públiku.

Durante vizita, Diretór Lafaek News relata progresu serbisu ba divulgasaun informasaun tanba iha períodu situasaun surtu COVID-19, jornalista mídia privadu ne’e sempre prontu nafatin hodi oferese informasaun.

Nune’e mós, kona-ba kestaun suplementu remuneratóriu ba jornalista sira no osamentu ne’ebé parte Sekretaria Estadu Komunikasaun Sosiál (SEKOMS) rasik apoia ba mídia sira ba publisidade kampaña prevensaun surtu COVID-19.

Dirijente ne’e mós hato’o planu Lafaek News atu loke sentru formasaun jornalístiku ne’ebé sei loke oportunidade ba timor-oan sira hodi kapasita-an iha área jornalizmu.

Entertantu, iha vizita ne’e Ministru Francisco asina karta apresiasaun hosi MAPKOMS ne’ebé dirije ba LAFAEK News, katak iha vizita dahuluk hosi membru Governu ida hodi apresia ba ezisténsia mídia online ne’e.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here