Primeiru-Ministru, Taur Matan Ruak. Imajen/Egas Cristovão

DILI, 30 jullu 2020 (TATOLI)–Primeiru-Ministru, Taur Matan Ruak hateten, ohin, nia parte informa ba Xefe Estadu kona-ba preparativus ba jornada orsamentál 2021 no implementasaun transferénsia cash osan ba populasaun sira ne’ebé ninia prosesu ramata ona no daudaun ne’e halo hela  sertifikasaun ba reklamasaun sira.

Taur Matan Ruak hatutan, iha tersa-feira (04 agostu 2020) semana oin, Governu sei halo jornada orsamentál ba 2021 hodi haree liu ba prioridade saida mak sei hili.

“Agora ami seidauk deside kona-ba tetu orsamentu ba tinan oin. Tanba, ami sei halo jornada orsamentál iha tersa-feira atu koloka ka  haree jerál ba prioridade saida mak ita hili ba 2021,” dehan Primeiru-Ministru, Taur Matan Ruak, hafoin hala’o enkontru ho Prezidente Repúblika, Francisco Guterres “Lú Olo”, iha Palásiu Prezidensiál Nicolau Lobato, Bairru Pité, Dili, kinta ne’e.

Iha jornada orsamentu ne’e, Taur Matan Ruak informa, Governu kria  grupu ida atu haree no prepara planu rekuperasaun ekonomika no kresimentu Timor-Leste nian ne’ebé lidera hosi ekonomista timoroan, Rui Gomes.

“Iha tersa-feira semana oin, ekipa ne’e sei halo aprezentasaun preliminar ba Membru Governu sira, hafoin iha kuarta-feira sei halo ba iha jornada orsamentu para fó ideia ida kona-ba 2021. Ita sei haree no hatene kona-ba preoridades saída mak ita sei hili atu investe. Naturalmente ita-nia foku mak ba rua ne’e, ida ba empregu no ida ba kresimentu ekonomia/rekoperasaun ekonomiku,” Taur hateten.

Tanba, Taur Matan Ruak esplika, agora ne’e informasaun hotu-hotu mai hosi Banku Mundial no mai hosi Banku Sentrál mak aponta katak Timor-Leste iha kresimentu negativu hanesan 2017 no 2018, entaun Timor-Leste nia esforsu halo oinsá mak bele hasa’e fali.

Jornalista : Osória Marques

Editór      :   Cancio Ximenes

HAKEREK NO HATÁN

Please enter your comment!
Please enter your name here