Jogadór FC Porto Taibessi no FIEL hadau malu kabesa bola. Imajen Mídia LFA

DILI, 30 jullu 2020 (TATOLI)-Governu liuhosi Sekretáriu Estadu Juventude no Desportu kompromete atu kontinua dezenvolve desportu liliu área futeból iha Timor-Leste.

Sekretáriu Estadu Juventude no Desportu, Abrão Saldanha. Imajen/ Egas Cristovao

“Agora daudauk iha ona programa atu halo sentru treinamentu joven nian iha Becora ajuda hosi KOICA, depois sei finaliza prosesu atu haree ba futeból nian. Ita iha problema ho juvenil, entaun ita tenke prepara jogadór sira ho idade U-15 no U-12 mai kraik nune’e ita bele hetan ona potensia jogadór ba oin,” dehan Sekretáriu Estadu, Abrão Saldanha, ba Tatoli iha Lecidere, kinta ne’e.

Atu dezenvolve desportu iha Territóriu Timor-Leste, SEJD sei tuur hamutuk ho Federasaun Futeból Timor-Leste no Ministériu Edukasaun Juventude no Desportu atu realiza eventu futeból sira hanesan jogu eskolár ba estudante sira.

Tanba antes ne’e jogu eskolár ba estudante ensinu sekundáriu iha Munisípiu 12 inklui Rejiaun Administrativa Espesiál Oé-Cusse Ambeno (RAEOA) la’o ona maibé paradu tiha hafoin akontese pandemia globál surtu COVID-19.

Jogu eskolár iha 2019, hetan suporta másimu husi patrosinadór Telecomcel no mós Governu. 

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here