efe Aldeia La Sees, Suku Camea, Postu Administrativu Cristo Rei, Munisípiu Dili, Fernanda Dias Lay. Imajen/Osória Marques.

DILI, 30 jullu 2020 (TATOLI)–Xefe Aldeia La Sees, Suku Camea, Postu Administrativu Cristo Rei, Munisípiu Dili, Fernanda Dias Lay, konsidera Governu liuhosi Sekretáriu Estadu Igualidade Inkluzaun (SEII) ne’ebé fó formasaun ba lideransa feto komunitáriu importante tanba liuhosi formasaun ne’e bele hakbiit feto sira-nia mentalidade oinsá bele hamriik iha oin atu ko’alia.

Notísia Relevante: Feto Sai Lideransa Komunitáriu iha Munisípiu Dili Hamutuk 42

Nia hatutan, formasaun ne’e maske hala’o ba loron rua de’it maibé nia sente aprende duni matéria barak tanba iha matéria ne’e hanorin oinsá feto sai lideransa ne’ebé brani hamriik iha oin atu ko’alia.

“Tuir formasaun ida-ne’e, ha’u fiar katak ba futuru hatudu katak ami feto mós bele tanba formasaun ida-ne’e atu aumenta tan ami-nia kapsaidade. Ami mós bele hamriik ona ko’alia iha oin. Dala barak ema mane sira ko’alia katak ami feto atu ko’alia ne’e sempre koi ulun maibé ho formasaun ida-ne’e, sei haforsa no haforte liután ami-nia kapasidade no sei muda ami-nia mentalidade atu bele ko’alia iha oin,” dehan Fernanda Dias Lay, ba Agência TATOLI hafoin tuir formasaun ba lideransa feto sira iha Munisípiu Dili ho tema “Hakbiit Lideransa Komunitária Feto Munisípiu Ba Asuntu Igualdade Jéneru hodi Prepara Planu Desentralizasaun Munisípiu iha Futuru” iha Salun SEII, Dili, foin lalais ne’e.   

Xefe Aldeia ne’e husu ba SEII, karik ba oin sei iha tan oportunidade ruma atu fó formasaun ba lideransa feto komunitáriu karik, labele fó loron rua de’it maibé se bele semana ida tanba formasaun ne’e di’ak tebes no feto presiza hetan informasaun.

Xefe Aldeia ne’e hatutan, formasaun sira ne’e importante tanba durante iha nia mandatu hahú iha tinan 2016 to’o mai agora, foin dala-uluk nia partisipa formasaun ida-ne’e. Nia dehan, se karik SEII fó formasaun sira ne’e antes kedas karik, feto sai lideransa komuntáriu ne’e la hasoru dezafiu.   

“Iha formasun ida-ne’e ha’u sente kapaas tebes tanba durante eleitu hahú hosi tinan 2016 to’o mai agora, foin ami dala-uluk hetan formasaun ida-ne’e. Karik, formasaun ida-ne’e fó antes karik, ami hanesan feto sai lideransa kumintáriu ne’e, ami nunka hasoru fallansu tanba feto hanesan jéneru ami mós hakarak hamriik iha oin hodi ko’alia,” Fernanda Dias Lay haktuir.

Tanba, nia dehan, dala barak ema haree katak feto forte nasaun forte maibé baihira feto menus formsaaun susar tebes feto sai forte. Maibé, tuir nia, liuhosi formasaun ida-ne’e futuru feto mós bele sai lideransa ne’ebé di’ak liután.

“Tanba dala barak ita haree katak ema dehan feto forte nasaun forte maibé ida ne’e loos ka lae.  Tanba, ita rona liafuan ne’e kapaas maibé realidade feto sei menus esperénsia tanba feto menus hetan  informasaun. Maibé ho formasaun ida-ne’e, ha’u sente kapaas tebes no futuru ami mós bele sai lideransa ne’ebé di’ak liután no hatudu katak feto forte nasaun forte,” nia dehan.

Jornalista  : Osória Marques

Editór        :  Cancio Ximenes

HAKEREK NO HATÁN

Please enter your comment!
Please enter your name here