Eis Deputadu Fausto Freitas da Silva “Liurai Tasi” IV Lejizlatura, ohin, eleitu nu’udar membru Komisaun Funsaun Públika (CFP-sigla portugés). Imajen/Espesiál.

DILI, 29 jullu 2020 (TATOLI)—Eis Deputadu Fausto Freitas da Silva “Liurai Tasi” IV Lejizlatura, ohin, eleitu nu’udar membru Komisaun Funsaun Públika (CFP-sigla portugés) iuhosi votasaun iha Parlamentu Nasionál.

Molok tama diskusaun no votasaun bankada parlamentár sira hatama proposta ho idak-idak ninia kandidatu. Bankada UDT/FM propoin João Pereira, Bankada FRETILIN propoin Fausto Freitas da Silva “Liurai Tasi” no Bankada KHUNTO propoin João Mestre Verdiál. Prosesu eleisaun ne’e la’o ho eskrutíniu.

Molok halo eleisaun, Sekretária Meza Parlamentu Nasionál, Deputada Lídia Norberta fó-sai biografia no kursu formál no naun-formál hosi kandidatu tolu ne’e.

Hafoin eleisaun kandidatu númeru 1 João Pereira hetan votu 17, kandidatu númeru 2 Fausto Freitas da Silva “Liurai Tasi” hetan votu 38 no kandidatu númeru 3 João Mestre Verdiál hetan votu 5. Deputadu na’in-lima (5) mak auzente iha eleisaun ne’e. Fausto Freitas Silva da Silva “Liurai Tasi” eleitu nu’udar deputadu iha IV Lejizlatura hosi Bankada FRETILIN iha momentu ne’ebá.

“Ho nune’e  meza deklara kandidatu númeru 2 ho naran Fausto Freitas Silva da Silva “Liurai Tasi” ne’ebé hetan votu 38 maka eleitu nu’udar membru ba Komisaun Funsaun Públika”, Prezidente Parlamentu Nasionál Ein-Ezersísiu atuál Segundu Vise-Prezidente Parlamentu Nasionál, Deputada Maria Angelina Sarmento Lopes, anunsia liuhosi plenária estraordinária, Parlamentu Nasionál, kuarta ne’e.

Fausto Freitas Silva da Silva “Liurai Tasi” moris iha Quelicai, Munisípiu Baucau iha loron 7 abríl 1963, abilitasaun literária Mestradu iha Jestaun Rekursu Umanu. Liurai Tasi eleitu nu’udar Deputadu iha IV Lejizlatura.

Vise-Prezidente Parlamentu Nasionál ne’e fó-sai katak, mandatu membru KFP ne’e ba tinan lima (5) hahú hosi 2020 to’o 2025.

“Kuandu iha votasaun ba kargu ruma mínimu 33 maibé ohin kandidatu Liurai Tasi hetan votu 38, ninia mandatu ne’e ba tinan lima,” dehan nia.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here