Ministru Asuntu Parlamentár no Komunikasaun Sosiál, Francisco Jerónimo, hadai fotografia hamutuk ekipa redasaun TVE, iha Raikotu, kinta (30/07). Imajen/MAPKOMS

DILI, 30 jullu 2020 (TATOLI)-Diretór Televizaun Edukasaun (TVE), Armindo Crisna Caetano, husu ba Governu liuhosi Ministériu Asuntu Parlamentár no Komunikasaun Sosiál (MAPKOMS) atu aselera  Lei Radiodifuzaun, tanba ho lei ne’e maka bele hamoris industrializasaun televizaun iha Timor-Leste.

“Durante ne’e programasaun sira ne’ebé tranzmite iha Televizaun Edukasaun, halai liu ba edukasaun atubele eduka sidadaun sira no trazmite debate sira inklui programa sira seluk tan, maibé problema mai ami maka TVE iha nia channel ketak palapa, ho nune’e ha’u husu ba MAPKOMS bele aselera lei ne’e atubele regulariza program sira ne’ebé trazmite iha televizaun privadu ne’e,” dehan Diretór TVE Armindo, durante intervensaun iha ámbitu vizita kortezia Ministru Asuntu Parlamentár no Komunikasaun Sosiál, Francisco Jerónimo, kinta ne’e, iha TVE, Raikotu.

Tuir Dirijente ne’e, bainhira selu satélite no halo tranzmisaun programa oinoin, mak laiha resita ruma hosi programa sira ne’ebé oferese ba públiku tanba laiha lei ruma atu regula televizasaun nia públikasaun no difísil atu dezenvolve indústria televizaun iha Timor-Leste.

“Tanba ne’e ita presiza iha Lei Radiodifuzaun atu halo kontrolu ho di’ak, nune’e karik tranzmite buat ruma bele tuir regra, maibé to’o agora ita-nia lei laiha susar tebes atu ita ko’alia industrializaun televiaun iha ita-nia rai,” nia subliña.

Hatan ba preokupasaun ne’e, Ministru Francisco hateten lei ne’e daudaun iha faze halibur hanoin hosi entidade relevante.

“Lei Radiodifuzaun daudaun ne’e iha ona prosesu nia-laran no iha ona diskusaun no iha tempu badak sei hasoru tan mídia hotu hodi haree hamutuk molok aprezenta ba Konsellu Ministru no lori ba Parlamentu,” nia informa.

Tuir governante ne’e, lei ne’e presiza halibur hanoin hosi parte barak hodi hadi’a esbosu ne’ebé iha ona, tanba lei ne’e sei aplika ba mídia hotu.

Biban ne’e, TVE relata preokupasaun balun liga ba problema administrasaun no finansiamentu ne’ebé maka durante ne’e mídia privadu ne’e hasoru.

“Ami rona preokupasaun husi parte hotu katak Televizaun Edukasaun iha problema barak ne’ebé hasoru iha administrasaun no finansimentu. Ha’u hanoin katak ami la’ós mai halo buat hotu maibé pelu menus ami mai atu haree hamutuk saida maka ami bele halo,” ministru subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here