Penária PN. Imajen Tatoli/Egas Cristovão

DILI, 28 jullu 2020 (TATOLI)—Primeiru-Ministru (PM), Taur Matan Ruak, husu Parlamentu Nasionál (PN) atu aselera alterasaun ba lei Sistema Saúde, Lei Migrasaun no Azilu nune’e ajuda Governu kombate pandemia COVID-19.

Notísia Relevante: Governu Hakarak Altera Artigu Iha Lei Sistema Saúde Hodi Define Loloos Liberdade Sidadaun

Governu Halo Alterasaun Dahuluk ba Lei Sistema Saúde

Xefe Governu haktuir, problema ida mak presiza ajuda kona-ba lei sira Governu haruka dekretu-lei ba Prezidente Repúblika kona-ba vijilánsia epidemiolójika ho sanátaria maibé Tribunál Rekursu deklara inkonstitusionál, tanba ne’e Prezidente Repúblika haruka fila ba Governu.

“Agora ita-nia alternativa ida de’it. Parlamentu Nasionál bele ajuda ami, primeiru halo alterasaun ba lei sistema saúde, lei imigrasaun no azilu no lei protesaun sivil maibé lei protesaun sivíl Parlamentu Nasionál aprova ona,” PM Taur ko’alia asuntu ne’e iha aprezentasaun relatóriu aplikasaun Estadu Emerjénsia (EE) durante fulan-tolu, iha plenária Parlamentu Nasionál, tersa ne’e.

Alterasaun Sistema Saúde ne’e ligadu ba propagasaun COVID-19 ne’ebé oras ne’e afeta mundu, lei migrasaun no azilu ne’e sei haree ba sirkulasaun sidadaun sira hosi rai-laran no ba rai-li’ur.

Ho alterasaun lei importante rua hodi ajuda Governu bele minimiza no atu hili alternativa seluk katak estadu emerjénsia.

“Maibé ida-ne’e mak kondisaun laiha. Ita iha dalan ida de’it para ita-nia asaun sira labele konsidera inkonstitusionalidade, ita hili estadu emerjénsia iha liña fronteira. Tanba ne’e ami presiza liu apoia Parlamentu Nasionál nian. Se ita hili Estadu emerjénsia permanente iha fronteira Governu disponivel ba opsaun ida-ne’e,” PM Taur Matan Ruak hateten.

Maibé, nia husu, PN altera lei sira-ne’ebé nesesáriu para enkuadra Hovernu nia esforsu hodi kontrola fronteira, entaun Governu presiza ajuda hosi Parlamentu Nasionál. 

 Entretantu, Parlamentu Nasionál ajenda ona proposta-lei Nú 19/V(2a)-alterasaun dahuluk ba Lei Nú 11/2017, de 24 maiu (Lei Migrasaun no Azilu).

Notísia Relevante: Prezidente Repúblika Veta Dekretu-Lei Rejime Jurídiku Vizilánsia Epidemiolójika no Sanitária

Jornalista : Evaristo Soares Martins

Editór        :  Cancio Ximenes

HAKEREK NO HATÁN

Please enter your comment!
Please enter your name here