Vise Ministru Justisa, José Edmundo Caetano. Imajen/Mídia CAC.

DILI, 29 jullu 2020 (TATOLI)-Kondisaun infraestrutura klínika iha Prijaun Becora hahú aat daudaun, tanba ne’e Governu liuhosi Ministériu Justisa iha ona planu atu halo reabilitasaun iha futuru.

“Ita haree kondisaun klínika iha prizaun nian komesa at ona, entaun ita presiza halo reabilitasaun nune’e para pasiente sira (dadur) bele utiliza bainhira moras,”katak Vise Ministru Justisa, José Edmundo Caetano, ba Jornalista sira hafoin halo vizita ba dadus sira iha Prijaun Becora, kuarta ne’e.

Alende, hadi’a kondisaun infraestrutura klínika nian, Governu mós sei fó atensaun ba problema falta bee moos, tanba ne’e nia parte deskute ona kestaun refere ho Ministériu Obrás Públikas hodi instala bee moos.

Governu liuhosi MJ sei ezekuta planu hirak ne’e liuhosi ezekusaun Orsamentu Jerál Estadu 2021 nian.

Diretór Estabelesimentu Prizaun Becora, João Domingos. Imajen/Antonio Goncalves

Entrantu, Diretór Estabelesimentu Prizaun Becora, João Domingos, ba Tatoli, via telefone hateten Governu estabelese klínika iha prijaun Becora hahú kedas iha tinan 2001 liubá hodi fó tratamentu saúde ba dadúr sira.

Kliníka Becora iha Doutór Na’in ida no Enfermeiru na’in rua, ne’ebé fó tratamentu saúde ba dadur sira hahú segunda to’o sesta. No kada sesta, doutór psikiater sira ba halo tratamentu saúde ba dadur sira ho problema mentál.

Daudaun ne’e, Prijaun Becora iha dadur hamutuk 591, mane 587, feto na’in haat, dadur ho idade labarik hamutuk 37.

“Dadur feto na’in haat ne’e hela provizóriu hodi halo tratamentu saúde depois rekupera sira sei fila ba prijaun Gleno (Ermera),”dehan Nia.

Husi totál dadur 591, kondenadu 459, prijaun preventive 132, dadur estranjeiru 15, Indonézia na’in ualu, Filipina na’in lima, Austrália na’in ida no Xina na’in ida.

Jornalista  : Hortencio Sanchez

Editór        : Agapito dos Santos

HAKEREK NO HATÁN

Please enter your comment!
Please enter your name here