Ministru Petróleu no Minerál, Victor da Conceição Soares. Imajen Tatoli/Egas Cristovão

DILI, 29 jullu 2020 (TOTOLI)-Reuniaun Konsellu Ministru (KM) halo ona deliberasaun hodi aprova proposta hosi Ministériu Petróleu no Minerál (MPM) ba nomeasaun Florentino Mateus Soares Ferreira, ba kargu Prezidente Konsellu Diretivu Autoridade Nasionál Petróleu no Minerál (ANPM) hodi troka Gualdino do Carmo da Silva, ne’ebé mandatu ramata ona iha loron 30 juñu 2020.

Ministru Petróleu no Minerál, Victor da Conceição Soares, hateten nomeasaun ba Prezidente ANPM foun tanba iha nesesidade institusionál.

“Ida-ne’e nesesáriu atu halo nomeasaun foun ba Prezidente ANPM tanba nesesidade maka haruka duni, iha nesesidade institusionál balun no iha mós razaun polítika, inklui konfiansa politíka,” tenik Ministru Victor ba Agência Tatoli iha Palásiu Governu, kuarta ne’e, hafoin reuniaun ezekutivu.

Notísia Relevante: Governu Nomeia Florentino Ferreira Nu’udar Prezidente Konsellu Diretivu ANPM Foun

Nia dehan, razaun Governu halo nomesaun ba Prezidente foun tanba haree ba Prezidente ANPM sesante nia mandatu kleur ona.

“To’o ona tempu Governu nomea ema seluk atu troka. Razaun tanba Prezidente sesante asume mandatu durante tinan 12 no agora atu ba 13. Portantu to’o tempu ona tenke fó fali oportunidade ba seluk tanba nia mandatu hotu ona no tenke halo fali nomeasaun foun,” nia subliña. 

Governante ne’e hatutan: “Ita labele husik ema ida iha fatin ida ho tinan naruk, tanba ne’e demokrasia la hanesan. Prezidente ANPM sesante nia mandatu agora ba tinan 13, ne’e tempu naruk demais.”

Ministru ne’e fiar katak Prezidente ANPM foun sei halo serbisu ho di’ak tanba iha ona esperiénsia barak.

“Iha fiar no iha konfiansa maka nomea ne’e, se la konfia halo nusa maka ita halo fali nomeasaun foun,” nia akresenta.

Florentino Ferreira antes ne’e integra iha ekipa negosiasaun Tratadu Fronteira Marítima ho Austrália hamutuk ho Prezidente sesante Gualdino ho ekipa, ne’ebé lidera hosi Xefe Negosiadór Prinsipál ba Asuntu Fronteira Marítima, Kay Rala Xanana Gusmão no eis Ministru Prezidénsia Konsellu Ministru, Agio Pereira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here