Logotipu MEJD

DILI, 29 jullu 2020 (TATOLI)-Ministériu Edukasaun Juventude no Desportu (MEJD) liuhosi Diresaun Jerál Pre-Eskolár no Ensinu Báziku, kuarta ne’e hala’o worshop ida ba Dirijente Edukasaun Munisípiu, Nasionál no RAEOA ho tema rekuperasaun aprendizajen ho seguru no equitativu nune’e bele reforsa prosesu aprendizajen ba estudante ho másimu liután.

Diretór Jerál Pre-Eskolár no Ensinu Báziku Ministériu Edukasaun Juventude no Desportu, Apolinario Serpa, hateten Worshop ne’e parte ida mós atu hametin konsensia Diretór, Inspetór Eskolár kada Munisípiu no Rejiaun Administrativa Espesiál Oé-Cusse Ambeno (RAEOA) atu la’o tuir nafatin matadalan Ministériu Saúde nian ba prevensaun moras COVID-19.

Ministériu Saúde ho Organizasaun Mundiál Saúde hasai ona padraun prevensaun surtu coronavirus ba kada eskola atu kumpre maka hanesan instala tanke bee moos kompleta ho torneira fase liman, uza máskara, mantein distansia sosiál no fiziku, kria fatin lixu, prepara sabaun fase liman, prepara hand sanitizer,  garante ambiente moos no seluk tan iha eskola idaidak.

“Politika ida ne’e Ministériu Edukasaun Juventude Desportu  kria atu hamosu planu mobilizasaun komunidade atu hamutuk rekopera aprendizajen ba eskola sira iha Postu Administrativu, Suku no  área rurál,”tenik nia iha Otél Novo Turizmu Dili, kuarta ne’e.

Nia dehan hafoin worshop ne’e, Diretór, no Inspetór Eskolár Munisípiu idaidak no RAEOA sei fila ba sira-nia fatin hodi introdúz ba estudante, profesór no mós komunidade nune’e bele tulun Governu hodi halo prevensaun ba moras refere no rekopera prosesu aprendizajen ida di’ak liután ba labarik sira.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here