Diretór Jerál Peska MAP, Acacio Guterres. Imajen/Natalino Costa

DILI, 29 jullu 2020 (TATOLI) – Diretór Jerál Peska iha Ministériu Agrikultura no Peska (MAP), Acacio Guterres, informa katak MAP iha ona planu prioridade iha futuru ne’ebé sei halo esplorasaun ba rekursu tasi-laran nian.

“Ita-nia planu ba oin maka atu haree liu oinsá atu halo esplorasaun ba ita-nia rekursu ne’ebé iha tasi-laran hanesan ikan, liuliu iha parte súl ne’ebé atividade ilegál a’as liu. Tanba ne’e ba oin ita-nia prezensa ne’e iha Tasi Timór,” tenik Diretór ne’e iha salaun MAP, Comoro, kuarta ne’e.

MAP liuhosi Diresaun Jerál Peska, realiza workshop nasionál ho objetivu atu parte Governu no parseiru dezenvolvimentu sira bele aprezenta programa peska no agrikultura ne’ebé maka durante ne’e halo ona no planu prioridade saida maka ba oin parte peska sei halo iha 2020 no 2021.

Tuir dadus hosi MAP, liuhosi satelite iha tinan-2018 deteta ró ilegál husi nasaun viziñu sira hamutuk unidade 107 maka halo peska ilegál ikan tonelada 236.449 iha Tasi Timór, ne’ebé bainhira konverte ba osan bele lakon to’o biliaun $1,120.

Enkuantu iha tinan-2019 ró unidade 63 maka tama Tasi Timór hodi halo peska ilegál.

Tanba ne’e, Governu iha ona hanoin atu halo akizisaun ró boot ne’ebé atu halo kontrolu iha área súl ne’ebé sempre iha peska ilegál, nune’e kompontente navál hamutuk ho polísia marítima bele halo kontrolu.

Aleinde ne’e, MAP mós iha planu atu hakiak ikan rai-maran.

“Ba oin sei haree mós atividae peska iha tasi no hakiak ikan iha rai-maran tanba ita iha poténsia boot iha ita-nia rai, nune’e ita bele haki’ak ikan hodi produsaun la mai de’it hosi tasi maibé hetan mós hosi rai-maran atubele kompleta malu no bele hasa’e produsaun rai-laran di’ak liutan,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here