Logotipu Tribunál Distritál

DILI, 29 jullu 2020 (TATOLI)-Organizasaun La’ós Governu nian Programa Monitorizasaun ba Sistema Judisiál (JSMP-sigla Inglés) apresia ho servisu Tribunál Distritál Baucau (TDB) ne’ebé reativa fila-fali julgamentu movel iha Munisípiu Viqueque depois paradu tiha tanba situasaun estadu emerjénsia.

Notísia Relevante : Tribunál Móvel Konsege Redús Prosesu Pendente Barak

Tuir monitorizasaun JSMP nian, iha  loron 06  to’o loron 10 jullu 2020, TDB   reativa julgamentu móvel ne’e konsege julga kazu ofensa ba integridade fízika simples ho natureza violénsia doméstika hamutuk 24 no maus tratu ba kónjuje hamutuk lima (5), husi total kazu ne’ebé Tribunál agenda ona atu julga hamutuk 45.

Hosi kazu ofensa ba integridade fízika simples ho natureza violénsia doméstika hamutuk 24 no maus tratu ba kónjuje 5 ne’ebé JSMP monitoriza, Tribunál konsege konklui kazu 21 ho pena prizaun maibé ninia ezekusaun suspende, kazu lima (5) konklui ho pena multa no kazu ida (1) konklui ho pena admoestasaun, enkuantu kazu rua (2) seluk ninia desizaun sei lee iha edifísiu Tribunál Distritál Baucau.

Julgamentu móvel ne’e realiza iha Eskuadra PNTL Viqueque no sala julgamentu iha fatin tolu, julgamentu ba prosesu koletivu fatin rua no julgamentu ba prosesu singulár fatin ida.

“JSMP apresia ho esforsu Tribunál Distritál Baucau atu hamenus kazu sira ne’ebé pendente ka rejista liu-liu kazu ho natureza violénsia doméstika depois Tribunál suspende nia funsionamentu normal durante situasaun estadu emerjénsia,” hateten Diretora Ezekutiva JSMP,  Ana Paula Marçal liuhosi komunikadu imprensa ne’ebé Agência Tatoli asesu, ohin.

Iha komunikadu ne’e haktuir mós katak, iha prosesu julgamentu durante loron lima (lima) ne’e parte sira maioria marka prezensa hodi tuir prosesu julgamentu, kazu balun Tribunál lee sentensa imediata no kazu balun Tribunál sei lee desizaun iha Tribunal Distritál Baucau.

Iha julgamentu móvel ne’e Tribunál konsege julga kazu hamutuk 42 no kazu tolu (3) Tribunál halo adiamentu tanba parte balun la marka prezensa. Parte sira ne’e mai hosi Postu Administrativu Viqueque, Lakluta, Ossu, Uatulari no Uatucarbau.

Hanesan tinan sira antes, JSMP preokupa kona-ba fatin ba prosesu julgamentu móvel. Durante ne’e, Tribunál sira dala barak utiliza edifísiu PNTL nu’udar fatin ba hala’o prosesu julgamentu. JSMP konsiente katak dalaruma difisil atu arranja fatin ne’ebé seguru no konfortavel ba parte sira, maibé tuir loloos, Tribunál la uza edifísiu polísia hanesan fatin ba julgamentu tanba bele hamosu duvida ba iha parte interesadu sira. Komunidade sira bele hanoin katak polísia iha kompeténsia deside sira-nia kazu tanba hahú hosi prosesu aprezenta keixa, julgamentu no desizaun hotu-hotu hala’o iha polísia.

JSMP  apresia ho julgamentu móvel bele  fasilita povu asesu ba justisa hamenus gastu sira ba transporte no akomodasaun tanba sira bele hela iha família hodi tuir julgamentu.

JSMP hein katak ho prezensa regulármente Tribunál móvel iha munisípiu sira komunidade sira bele sente katak justisa ne’e iha duni ba sira.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here