Eis Prezidente Repúblika, Ramos Horta. Imajen Tatoli/António Gonçalves

MANATUTO, 29 jullu 2020 (TATOLI)Eis Prezidente Repúblika, José Ramos Horta, husu ba manatuto-oan, liuliu komunidade sira iha área Ilimanu atu koopera ho kompañia Elegant Marble Group unip, limitada (EMG) no kompañia lokál Uma Marble Timór (UMT), lda, hodi hala’o peskiza mármore iha área Ilimanu, Suku Uma-Kaduak, Postu Administrativu Laclo, Munisípiu Manatuto ho susesu.

“Ha’u husu ba manatuto-oan atu apoia kompañia sira atubele halo peskiza hodi haree ita-nia mármore nia kuantidade no kualidade atu ba oin bele investe tan ba esplorasaun no buka merkadu,” tenik Horta bainhira partisipa diseminasaun informasaun kona-ba projetu peskiza mármore ba komunidade, kuarta ne’e iha Ilimanu, Laclo.

Notísia Relevante: ANPM-Empreza EMG no UMT sosializa peskiza mármore ba komunidade Ilimanu

Laureadu Prémiu Nobel da Paz ne’e kongratula Governu liuhosi Autoridade Nasionál Petróleu no Minerál (ANPM) no kompañia EMG no UMT tanba bele fahe informasaun ba komunidade sira atu hatene benefísiu investimentu projetu mármore.

“Ita-nia komunidade sira bele esklarese benefísiu hosi investimentu ne’e, atu investidór sira bainhira mai, ita-nia komunidade bele koopera hodi rezolve sira-nia susar no mehi ne’ebé sira hakarak,” nia subliña.

Ramos Horta husu mós ba empreza sira atubele ajuda komunidade iha área Ilimanu hodi hetan  serbisu bainhira iha rekursu umanu hanesan enjeñeira, tékniku informátika inklui naun skill sira  atu sai motorizta ka iha área seluk.

“Ha’u koñese kompañia ne’e tanba koñesidu no iha esperiénsia iha internasionál ne’ebé sira halo estudu tanba ita haree iha rai leten iha mármore ne’ebé to’o tinan-rua Governu sira haree rezultadu hodi halo kontratu esplorasaun atu lori fatuk ka loke fábrika hodi fó serbisu ba timor-oan sira,” nia akresenta.

Ho nune’e, Horta espera bainhira projetu mármore ne’e ho rezultadu di’ak atu halo esplorasaun, bele loke fábrika hodi halo prosesamentu atu labele kee no lori ba estranjeiru atu fó serbisu ba timor-oan no Manatuto-oan sira.

ANPM hodi naran Ministériu Petróleu no Minerál (MPM) asina ona kontratu prospesaun ho empreza EMG, hosi Xina atu halo peskiza mármore ne’e kuaze ektare 16.000 ho durasaun peskiza durante fulan-18 ho kustu orsamentu $800.000.

Enkuantu ANPM ho empreza UMT ho durasaun peskiza tinan-ida no área peskiza ektare 400 no ho kustu orsamentu $600.000, iha área peskiza iha parte norte Postu Administrativu Laclo ho ektare 400.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here