Primeiru-Ministru, Taur Matan Ruak prezide reuniaun Konsellu Ministru iha Palásiu Governu, kuarta (29/07). Imajen Tatoli/Egas Cristovão

DILI, 29 jullu 2020 (TATOLI)-Governu liuhosi reuniaun Konsellu Ministru (KM) aprova medida haat ba kurtu prazu nian, ba mitigasaun hosi impaktu krize ekonómika ne’ebé rezulta hosi pandemia COVID-19, iha ámbitu Planu Rekuperasaun Ekonómika.

Medida haat ba kurtu prazu ne’e ho objetivu prinsipál maka atu apoia hodi hatán ba sidadaun sira-nia nesesidade bázika, apoia traballadór sira iha setór informál, mantein postu traballu sira no rendimentu inklui mantein empreza sira iha merkadu.

“Governu deside atribui bein alimentár no ijiene pesoál esensiál lubuk ida, hanaran cesta básica ka nu’udar alternativa hanesan voucher hodi sosa sasán ka bein sira ne’ebé sei fó ba sidadaun hotu ka sidadaun sira ne’ebé hela iha Timor-Leste. Tanba ne’e, bein sira di’ak liu tenke maihosi produsaun nasionál ka lokál,” relata Ministru Prezidénsia Konsellu Ministru, Fidelis Manuel Leite Magalhães hafoin ramata reuniaun ezekutivu iha Palásiu Governu, kuarta ne’e.

Empreza ka entidade empregadora seluk hosi setór privadu, sei hetan apoiu liuhosi kria subsídiu mensál ho karatér pekuniáriu, ne’ebé sei atribui durante fulan-lima nia-laran ba entidade empregadora ne’ebé retoma fali sira-nia atividade ho forma regulár, lahó suspensaun ka redusaun ba oráriu normál serbisu nian no sira inskreve ona iha seguransa sosiál no iha administrasaun fiskál no mós entidade sira ne’ebé seidauk iha kondisaun atubele retoma fali sira-nia atividade regulár, sei enkuadra iha setór turizmu.

Entidade empregadora sira sei hetan mós dispensa atu la halo devér pagamentu ba kontribuisaun sosiál durante períodu fulan neen nia laran.

“Governu sei kria mós apoiu ida ba traballadór hosi setór informál, liuhosi kria subsídiu ekivalente ho porsentu 60 hosi valór remunerasaun konvensionál ne’ebé sai nu’udar baze insidénsia kontributiva hosi eskalaun dahuluk ba adezaun fakultativu ba rejime kontributivu Seguransa Sosiál nian, durante fulan-outubru, novembru no dezembru,” Fidelis informa.

Portavóz III Governu ne’e esplika, atubele asesu ba apoiu ne’e, benefisiáriu sira bele ba rejista iha Seguransa Sosiál iha fulan-agostu no setembru 2020, ho kondisaun ida katak sei halo pagamentu ba kontribuisaun ne’e rasik ba Seguransa Sosiál durante fulan-tolu tuirmai, sura kedas hosi loron ne’ebé simu ona prestasaun dahikus subsídiu nian.

Maibé atu implementa maka Governu sei liuhosi KM hodi aprova Dekretu-Lei ida hodi define ninia regulamentu sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here