Prezidente Agência Tatoli, IP, José da Costa. Imajen Tatoli/Egas Cristóvão

DILI, 27 jullu 2020 (TATOLI)–Prezidente TATOLI,I.P, José da Costa, hatete membru Governu ne’ebé mak tutela define no kompromete ona katak sei hadi’a edifísiu ida ba TATOLI ho RTTL ne’ebé junta iha Aimutin nian, maibé daudaun ne’e TATOLI kontinua esforsu hodi funsiona ninia atividade kobertura no publikasaun.

“Ba ami hanesan jestór iha TATOLI katak iha oportunidade di’ak maibé ami labele hein edifísiu, ami tenke kontinua esforsu funsiona atividade kobertura no publikasaun. Ami maksimiza buat saida mak ami iha, tanba ami iha edifísiu temporáriu iha Farol,” dehan Prezidente TATOLI,I.P, José da Costa, ba jornalista sira hafoin selebra aniversáriu Agência TATOLI ba dahaat (27 jullu 2016-27 jullu 2020) ne’ebé hala’o iha Salaun Ian Martin, INFORDEPE, Balide, Dili, segunda ne’e. 

Nia dehan aproveita fatin temporáriu ne’e, kontinua mellora di’ak liutan ba futuru tanba iha kompromisiu boot ida ne’ebé mak estadu tau hela, katak TATOLI tenke funsiona hanesan ajénsia notisioza ida ne’ebé la’ós funsiona de’it iha nasionál maibé mós iha internasionál.

“Klaru katak atu to’o iha ne’ebá, lori prosesu uitoan tanba ami tenke investe liután rekursu umanu, fasilidade no ekipamentu di’ak. Maibé ami kompromitidu katak tempu ida ami sei to’o iha ne’ebá. Agora daudaun ami sei buka atu hadi’a ami-nia aan, para hahú oinsá públika ka kumpre estatutu TATOLI nian kona-ba lian inklui multimedia, multikanál depois neineik mak ita bele ko’alia kobertura iha rai liur,” nia dehan. 

Tuir nia, loron ohin TATOLI kompleta ba tinan haat no ein-termu funsionamentu loloos ne’e bele dehan tinan ida ho balu tanba iha ne’e mak estrutura no redasaun funsiona ho di’ak.

“TATOLI, ohin kompleta ba tinan haat estabelese no ein-termu funsionamentu loloos ne’e, ita bele dehan foin mak tinan ida ho balu, tanba iha ne’e mak foin estrutura no redasaun funsiona ho di’ak,” nia dehan. 

Prezidente TATOLI hatutan, TATOLI kompleta tinan haat ona no sente buat barak mak hala’o ona, pratikamente iha tinan haat ne’e iha dezafiu maibé ho forma hotu-hotu bele ultrapasa.

“Maibé hosi dezafiu hirak ne’e, iha oportunidade ba ami barak hodi foti jornada sira. Ida, iha situasaun ne’ebé difísil maibé ami ultrapasa no rua ho ekipamentu no rekursu ne’ebé di’ak para depois halo melloramentu iha publikasaun,” nia hateten. 

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here