UPF halo operasaun iha liña fronteira terrestre. Imajen/Eugénio Pereira

DILI, 27 jullu 2020 (TATOLI)—Bankada Parlametár Partidu Congresso Nasionál da Reconstrucão de Timor (CNRT) husu Governu atu apoia ekipamentu ba polisia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) hodi kontrola másimu ba sidadaun sira-ne’ebé tama ilegalmente mai Timor-Leste.

Xefe Bankada CNRT, Deputadu Duarte Nunes hateten, moras COVID-19 iha nasaun viziñu sei kontinua sa’e, tanba ne’e seguransa no defeza iha fronteira tenke kontrola másimu hodi ema labele tama liuhosi dalan ilegál.

“COVID-19 sei fó perigu mai ita, tanba ita iha viziñu (Indonézia) moras ne’e kontinua aumenta tanba ita haree autorizasaun ne’ebé fó para ema tama hosi fronteira  semanalmente oras rua ne’e iha poténsia atu lori moras ne’e mai,  kuandu Governu autorizasaun husik ema tama mai tenke sukat nia kapasidade  atu trava moras ne’e labele alastra ema seluk,” dehan Duarte Nunes iha Parlamentu Nasionál, segunda ne’e.

Xefe Bankada CNRT ne’e sujere ba Governu aumenta fasilidade ba PNTL no F-FDTL ne’ebé mak kontrola movimentu ema tama no sai,  mantein sira-nia fatin iha lista ne’ebé mak hetan subsídiu ne’e,  depois sira iha vontade hodi kontrola másimu iha fronteira.

Nia hatutan, Governu tenke tau atensaun ba situasaun ne’e, tanba se Timor-Leste hakarak  trava moras COVID-19 hodi fó fiar ba instituisaun PNTL ho F-FDTL tenke aumenta subsídiu no fasilidade movimentasaun karreta no ekipamentu sira seluk ba forsa rua ne’e.

Nia subliña, laiha fasilidade ba sira hodi kontrola di’ak iha fronteira liu-liu sira ne’ebé tama ilegál, hanoin Timor-Leste iha posibilidade sei afeta tán COVID-19.

Nia akresenta, la’os intensionalmente hakarak husik maibé kuandu situasaun ne’ebé mak sira hasoru hanesan fatin ilegál no legál, depois laiha apoia fasilidade hodi koordena populasaun ho populasaun sira iha fronteira ne’e susar.

“Tanba fronteira terrestre ne’e naruk. Sira laiha fasilidade no susar ba sira atu kobre hotu,” dehan Xefe Bankada CNRT ne’e.

 Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here