Abitante sira nebe kumpri ona loron 14 iha kuarentena wainhira husik hela kuarentena Tasitolu hodi fila ba hamutuk ho sira nia familia, 30 Abril 2020.Imajen/TATOLI

DILI, 28 jullu 2020 (TATOLI)-Ministériu Saúde kontinua prepara fatin kuarentena obrigatóriu ba Traballadór Timoroan iha Korea Súl no Estudante iha rai-liur hamutuk 160 ne’ebé maka tuir planu sei fila mai Timor-Leste iha tempu badak.

Diretóra Prestasaun Saúde, Odete da Silva Viegas, hateten kuarentena obrigatóriu Tasi-Tolu iha kama hamutuk 230, maibé daudaun ne’e foin akumula okupante hamutuk 60 durante loron 14 ba prevene transmisaun surtu COVID-19.

Notísia Relevante :Governu Kontratu Citilink Lori Fila Timoroan iha Korea Súl

Enkuantu, kuarentena Tibar, Postu Administrativu Bazartete Munisípiu Liquiça iha kama hamutuk 31, no oras ne’e iha okupante 29.

”Sidadaun sira se de’it mak tama mai sei Kuarentena iha Tasi-Tolu no Tibar ne’ebé mak Governu prepara ona,”informa Odete Viegas da Silva, ba Tatoli, iha Caicoli, segunda ne’e.

Notísia Relevante :Governu Deside Ona Lori Fila Mate-Isin Timoroan iha Korea

Nia hatutan kona-ba traballadór Timoroan no estudante hamutuk 160 ne’ebé tuir orariu sei mai Timor-Leste iha loron 30 fulan-jullu ho Aviaun Citilink iha posibilidade sei adia ba loron 05 fulan-agostu 2020.

”Informasaun ne’ebé mak ha’u rona husi Sekretariu Jerál MNEK katak iha mudansa oituan ba traballadór  sira ne’ebé mak atu mai dalaruma muda fali ba loron 05 agostu entaun ita nafatin iha espasu kurantena  Tasi-Tolu no Tibar,”nia esplika.

Entretantu, Traballadór Timoroan iha Korea Súl ne’ebé maka sei fila mai Timor-Leste tanba vistu servisu mate ona.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here