Avansadu prinsipal Boavista FC Timor Henrique Martins.

DILI, 28 jullu 2020 (TATOLI)-Jogadór Futeból husi Selesaun Nasionál U-23, Henrique Martins, preokupa ho kondisaun infraestrutura báziku liliu kondisaun estádiu sira para suporta atividade jogadór sira nian relasiona eventu Kopa no Liga Futeból iha futuru.

Tuir planu iha fulan-agostu ne’e, Federasaun Futeból Timor-Leste (FFTL) sei realiza Kopa FFTL ba klube 20 ne’ebé hamahan aan iha Liga Futeból Amadora (LFA). FFTL eskoilla ona Estádiu Munisipál Gleno hodi hala’o eventu ne’e.

Enkuantu, Estádiu Munisipál Dili daudaun ne’e ninia prosesu reabilitasaun seidauk ramata. Projetu reabilitasaun Estádiu Munisipál Dili antes ne’e toma konta husi Kompañia Marino Interprise iha 2015 ho orsamentu millaun $ 1.5, no Governu selu ona pursentu 70.

Notísia Relevante :Kondisaun Estádiu Dili La Permiti Realiza Jogu Semana Ida Dala Haat

Maibé la konsege finaliza obra ne’e maka Konsellu Administrasaun Fundu Infraestrutura (KAFI), hamutuk ho Ajénsia Dezenvolvimentu Nasionál (ADN), foti desizaun hodi hapara kontratuba kompañia refere hodi loke konkursu foun atu finaliza projetu ne’e.

“Ami sente triste oituan hanesan jogadór haree ba infraestrutura iha futeból seidauk di’ak maske liga la’o ba époka haat ona, konndisaun hanesan fasilidade sira ba klube no jogadór seidauk di’ak,” dehan Jogadór Avansadu husi Klube Boavista FC ba Tatoli, via mídia sosiál facebook, tersa ne’e.

Notísia Relevante :Sekretáriu Estadu Abrão Esforsu Rezolve Estádiu Munisipál Dili no Manatuto

Mezmu nune’e Jogadór ho númeru kamizola 10 ne’e orgullu tanba haree dezenvolvimentu iha área desportu futeból ninian hahú la’o maski neneik.

“Hanesan jogadór foinsae sente kontente no orgullu tanba bele partisipa iha futeból liliu iha liga ne’ebé ha’u partisipa durante tinan haat ona foin mak sente loloos partisipasaun ha’u nian iha futeból,” tenik Jogadór Timoroan ne’e.

Nia rekomenda ba Governu atu prepara mós kondisaun fasilidade ba Jogadór sira iha klube nasionál sira para fasilita jogadór sira hodi dezenvolve sira ninia talentu iha área futeból.

“Husi klube mak ami kadi, ami nia talentu iha ne’ebá, Governu tenke prepara ona kondisaun liliu fasilidade,”nia hatutan.

Iha Liga Futeból Amadora (LFA) époka dahuluk nian, Henrique Martins, joga iha klube DIT FC,  no iha 2016 muda ba Klube CARSAE ne’ebé ikusmai nakfilak ba klube Boavista FC Timor no konsege lori klube ne’e hetan vitoria iha LFA 2018.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here