Xefe Departamentu Promosaun Partisipaun iha Políitka SEII, José de Carvalho, iha ninia aprezentasaun iha 'Hakbiit Lideransa Komunitária Feto Munisípiu Hodi Prepara Planu Desentralizasaun Munisípiu iha Futuru. Imajen/media SEEI.

DILI, 27 jullu 2020 (TATOLI)–Governu liuhosi Sekretária Estadu Igualdade Inkluzaun (SEII) fó formasaun ba Lideransa Feto sira iha munisípiu Dili ho tema ‘Hakbiit Lideransa Komunitária Feto Munisípiu Ba Asuntu Igualdade Jéneru Hodi Prepara Planu Desentralizasaun Munisípiu iha Futuru’ hodi kapasita sira-nia konesementu iha polítika.

Notísia Relevante: Feto Sai Lideransa Komunitáriu iha Munisípiu Dili Hamutuk 42

Xefe Departamentu Promosaun Partisipaun iha Políitka SEII, José de Carvalho, iha ninia aprezentasaun hatete vizaun no misaun SEII katak Timor-Leste sei sai hanesan nasaun ida ne’ebé prósperu nakonu ho dame no sosiedade ida ne’ebé iha igualadde jéneru no inkluzivu ne’ebé ema-nia dignidade no direitu umanu inklui direitu feto no labarik feto ne’ebé hetan ona valór, protesaun no promove iha lei no kultura sira.

Nia dehan, misaun SEII mak atu halo instituisaun sai sensivél ho asuntu jéneru liuhosi estratejia Abordajén Integrada Jéneru (AIJ) iha polítika, lei, programa no orsamentu no halo advokásia ba komunidade atu iha sensibilidade ba jéneru iha nivél nasionál, munisipál no lokál liuhosi hakbiit no promove partisipasaun feto iha dezenvolvimentu iha iha área polítika no nivél foti desizaun.

“Misaun ida mak hapara violénsia kontra feto, labarik feto no grupu risku sira, maibé presiza hakbiit no promove partisipasaun feto iha dezenvolvimentu ekonómiku iha Timor-Leste no mós hasa’e partisipasaun feto iha área polítika no nivél foti desizaun iha nasionál, munisipál no suku,” dehan .

Entretantu, partisipante Francisca de Jesus Boavida hateten, formasaun ne’ebé mak SEII oferse durante loron rua (27-28/06/2020) kona-ba ‘Hakbiit Lideransa Komunitária Feto Munisípiu Ba Asuntu Igualdade Jéneru Hodi Prepara Planu Desentralizasaun Munisípiu iha Futuru’ ne’ebé di’ak tebes tanba bele kapasita sira-nia konesementu iha polítika.

“Ohin, ami mai tuir formasaun ne’ebé mak SEII oferese hodi hasa’e no hakbiit feto iha polítika. Hakbiit feto katak ita sai hanesan lideransa ida ka xefe suku tenke kontribui ba ita-nia suku no ita-nia komunidade hodi dezenvolve ita-nia suku rasik,” dehan Xefe Suku Gricenfór, Francisca de Jesus Boavida ba jornalista hafoin tuir formasaun kona-ba ‘Hakbiit Lideransa Komunitária Feto Munisípiu Ba Asuntu Igualdade Jéneru Hodi Prepara Planu Dsentralizasaun Munisípiu iha Futuru’ iha salaun SEII Obrigado Barak, Dili, segunda ne’e.

Atuál Xefe Suku Gricenfór, Postu Na’in Feto Munisípiu Dili ne’e hateten, bainhira formasaun ramata, nia sei hatutan formasaun ne’e ba nia feto maluk iha suku laran hodi kapasita mós sira no bele partsipa para hamosu iha ambisaun ida ba sira hodi nune’e iha periódu mai fali, sira bele kompete ba eleisaun lideransa suku nian iha futuru.

“Liuhosi formasaun ida ohin ne’e, ha’u bele konvoka enkontru ida hodi halibur ha’u-nia feto maluk sira hodi hasa’e no hamosu sira-nia ambisaun hodi bele kompete iha elisaun suku iha futuru,” nia dehan. 

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here